Recientemente Banco Central di Aruba (BCA) a conclui su encuesta den cuadra di ‘Isla Innovativo’, unda a haci varios pregunta na mas cu 150 ehecutivonan di diferente sectornan riba innovacion den nos economia. Anteriormente a publica e resultadonan riba crecemiento competitivo, y awor BCA ta enfoca riba e resultadonan pa cu transaccionnan financiero. E resultadonan ta mustra cu innovacion ta esencial pa mehora productividad y desaroyo economico di nos isla.
Segun e encuesta casi tur compania (95%) tin un cuenta di deposito na un banco local. Sin embargo, menos cu mitad di e negoshinan (48%) a informa di tin un cuenta di seguro of un cuenta di prestamo local (35%). Alabes mayoria di e companianan local (57%) a indica cu e ta sumamente dificil pa haya acceso na capital financiero notabel ta cu inclusion financiero di empresanan chikito y nobo ta keda un reto pa desaroyo economico.
Ademas, solamente 1 den cada 4 empresa ta experencia transaccionnan financiero sin friccion y di forma eficiente. Mientras 40% di e ehecutivonan ta considera pagonan inter-bancario facil, menos cu un tercer parti ta indica cu haci y ricibi pagonan como algo facil. Un averahe di 21% di negoshinan ta haci uzo di pagamento digital, y un 8% ta propietario di un cartera digital.
Pa mayoria di e negoshinan, pagamento door di credit of debit card ta domina, cu 1 den 4 consumidor pagando cash. Den termino di expectativanan, 66% di e ehecutivonan ta kere cu monedanan digital lo forma parti di e paisahe di pago Arubano den e proximo 5 aña.
BCA ta gradici tur participante pa nan contribucion valioso. Lo bay organisa mas tayer di innovacion pa stakeholdernan y den colaboracion lo traha riba un vision pa futuro innovacion den e lunanan venidero.