Rene Bernabela di Sindicato TOPA ta splica tocante e desaroyo di e pensionadonan.
Segun sr. Bernabela, e reunion cu nan tabatin cu Minister di Asuntonan Social a bay di forma positivo. E temanan cu a wordo trata tabata rib’e aspecto di e gelijk bedrag y bashi premie. Gobierno tin atencion pa cu e situacion aki. Recientemente, el a wordo trata den Parlamento y el a wordo aporba unanimamente pa locual ta un solucion pa e dos temanan aki. Sindicato TOPA ta den espera awor pa un resultado satisfactorio pa tur esunnan cu a baha cu pension desde 1 di Januari, 2015, por cobra di locual a wordo kita inhustamente.
Sr. Bernabela ta sinti cu no mester bay rib’e aspecto di Dialogo Social, pasobra na momento cu a pone paro rib’e pagamento di e gelijk bedrag y bashi premie tabata un decision cu e tempo ey no a wordo bon splica na e gobernantenan. Awor e problema cu ta sinta pa e pensionadonan ta e parti di indexering cu tin di haci cu nan koopkrachtverlies. Esey ta caminda Minister Bermudez den gobernacion anterior a laga para esaki y a bisa cu no ta sigui paga esakinan mas. Esaki ta locual Sindicato TOPA kier pa Gobierno actual cambia e decision aki y paga e pensionadonan cu ta 30 den su totalidad.