Despues di cu e informe aki a sali na lus, e accionnan di e compania a cay cu’n 10% den menos di 24 hora riba e New York Stock Exchange.
Un investigacion di Reuters a revela cu e compania Mericano Johnson & Johnson (J&J), dedica na benta di productonan di baby y farmaceutico, entre otro, durante varios decada tabata sa cu e talco di puiro tabata contene un sustancia cu tabata causa cancer.
E agencia Britanico a analisa un serie di documentonan, como tambe e declaracionan y testimonionan di huicio cu ta mustra cu, al menos desde 1971, te cu principio di decada pasa, tanto e ehecutivonan como e cientificonan, dokter y abogadonan di e compania Mericano aki tabata sa cu e producto cu nan tabata elabora a test positivo pa cantidadnan chikito di asbest.
Na Johnson & Johnson nan tabata na altura di e problema y a purba na influi den e plannan di reguladornan na hora di limita e mineral aki den productonan cosmetico como tambe e intentonan di investiga e impacto riba e salud humano, segun Reuters. Ademas, e documento ta bisa cu nan no a informa autoridadnan ni e publico di esaki, manera cu ley ta stipula.
Despues cu e informacion aki a sali na cla, e accionnan di Johnson & Johnson a cay cu 10% den menos di 24 hora riba e New York Stock Exchange. Esaki ta representa su mayor caida den un sola jornada desde julio di 2002. Awo e compania Mericano ta enfrentando un serie di demanda cu ta alega cu e uzo di nan puiro di talco pa baby a provoca e demandantenan varios tipo di cancer y otro malesanan.
Na juli ultimo, un hurado di St. Louis (Missouri, Merca) a obliga e compania na paga un daño y perhuicio di 550 miyon dollar na 22 muhe cu a afrima di a haya cancer di ovario door di a uza nan productonan di talco, aunke e compania, dirigi pa Alex Gorsky a bisa di lo apela e decision hudicial aki.