Esaki ta e prome biaha cu tin un presupuesto supletorio, budget neutral. Esaki kiermen cu gobierno no a bin parlamento pa pidi pa mas recurso. Es decir, cu e ta un presupuesto dentro di e margennan. Sr. Rocco Tjon, lider di fraccion di MEP, ta elabora.
Den tur rapport cu a compaña e presupuesto supletorio, esaki ta resalta. P.e. e nader rapport (di gobienro mes), unda cu nan ta elabora ariba e puntonan di critica di Raad van Advies. Pero e rapport di CAft mes ta bisa cu e gobierno a keda dentro di e margen di e deficit stipula den e memorandum economico financiero. Esaki kiermen cu gobierno tin mas espacio pa soluciona e debe cu pais Aruba tin. Pa soluciona e debe, gobierno a stipula un rumbo cu nan kier bay encamina. Esaki a keda presenta na april 2018, ora cu e trata e presupuesto di pais Aruba. Y den e esaki nan a stipula e normanan nobo. Es decir, cu na 2018 un deficit di 3%, y a logra un deficit di 2.9%. Y e bedoeling ta pa presupuesto 2019, tambe logra e norma nobo cu ta un deficit di 25 miyon florin.
Durante tratamento di presupuesto 2018, a presenta su plan di maneho, y semper a bisa cu esaki ta loke a enfatisa durante e tratamento di presupuesto supletorio, ta cu inversionnan aworaki ta tuma luga den e departamentonan cu a wordo neglisha pa hopi aña. P.e e Bureau di Sr. Mike Emantabata wordo maneha cu 12 miyon y pico florin. Y Sra. Evelyn Wever- Croes ta maneha e mesun ministerio cu 4 miyon florin. Awo e prioridad ta na e departamentonan en cuestion. Y durante e presupuesto 2018, a mustra cuanto recurso ta bay tin mester, pa sanea no solamente e situacion financiero, pero tambe e retonan cu e aparato gubernamental ta enfrenta.
Presupuesto 2018 a wordo aproba augustus di e aña aki. Gobierno na un manera transparente, a bin presenta na parlamento a base di cifra e ‘uitputtingcijfernan’. Dus parlamento por a wak con nan ta ehecuta presupuesto 2018, y e ora caba tabata bisto pa Parlamento cu nan ta bay ehecuta esaki dentro di e margennan. Esey a keda comproba ayera, ora cu a trata e presupuesto supletorio, unda cu tabata tin solamente verschuiving entre posten y no a pidi recurso adicional.
Na 2017, e parlamento nobo a hay’e confronta cu’n presupuesto supletorio di recursonan adicional di 130 miyon florin. Esaki ta door cu e proceder di e gabinete anterior, ta cu nan ta proyecta cifranan irealistico. Na 2017, nan a proyecta rond di 70 miyon florin di entrada pa un supuesto entrada di refineria, cual te ainda no a sosode. Y na 2016 tambe nan a haci esaki, unda cu tabata tin un presupuesto supletorio cu a wordo aproba, dus nan a pidi recursonan adicional di 10 miyon florin, cu te dia di awe, no a conta cu e aprobacion di parlamento.
Hulanda ta poniendo hopi presion pa baha gastonan, y partido MEP ta para pa baha e gastonan aki. Y segun Sr. Tjon a sigui bisa cu, no mester mescla politica cu gastonan di personal. Durante tratamento di e presupuesto, a enfatisa ariba e aspecto aki. Mayoria di gastonan di personal tin di haber cu overtime. Muy en particular den e ministerio di Husticia. Y esaki ta pa e.o. e motibo cu tin un personeel support masha grandi mes. Tin un shortage na personal y obviamente ta bay tin overtime, mester bisa cu den e orde dienstenan e ta bay suma na 5 miyon florin.
Fraccion di MEP ta para pa baha esaki. Y ta kere den un aparato gubernamental mas eficiente, p’esey tambe conforme e Beleidsplan Verlaging Personeellasten, tin como shete instrumento con ta bay baha esaki. No mester lubida cu gastonan di personal a baha caba e aña aki y pa otro aña, esey ta e ‘ijkmoment’ cu CAft y Hulanda tambe louza, e ta na 479 miyon florin, cu ta un rebaho di 6 miyon florin caba. Esey tambe tabata un punto di discusion dialuna, e continuacion di supervision financiero. Fraccion di MEP no a bay mucho profundo den esaki, ya cu e supervision lo wordo trata durante e ley di LAFT, tin algun aspecto cu lo atende den e reunion ey. Gobierno a trata nan maneho a traves di e Memorandum Financiero Economico. Y den parlamento lo zorg pa drecha y coregi e parti constitucional.
Te asina leu, Sr. Rocco Tjon, lider di fraccion di MEP den parlamento.