Pa prome biaha den historia, cuminsando diabierna awo, 11 November 2016, Aruba lo ta e anfitrion di e weganan Panamericano di Beach Tennis organisa pa e organisacion di ITF hunto cu e organisacion local di Beach Tennis BTA. Un torneo cu ta ser organisa desde 2013 y cu Brazil tabata tin e honor di tabata e anfitrion. Pa e prome 3 aña nan esaki a tuma luga na 3 diferente localidad na Brazil, esta Porto Seguro den 2013, Santos na 2014 y aña pasa esaki a tuma luga na Sao Paulo.
Durante e prome weganan Panamericano di Beach Tennis un total di 3 pais a pariticipa cual nan ta Brazil, Venezuela y Chile. Na 2014 y 2015 ITF a mira e mes un cantidad di pais cu a participa cual tabata 5. E 2 nan cu a bin acerca tabata Argentina y Aruba. Pa loke ta 2016 nos tin en total 6 pais: Venezuela, Brazil, USA, Puerto Rico, Ecuador y naturalmente Aruba. Ta bon pa informa cu e sistema cu e weganan ta ser hunga ta categoria doubles men, doubles women y tambe mix doubles. Ta saca campeon di cada un categoria y despues, contanto e total di puntonan, ta yega na e paisnan cu ta keda den premiacion.
Tumando nota di e lista aki, por mira claramente cu Brazil ta e pais cu ta domina den e region Panamericano, pero nos a compronde cu tin paisnan participante cu a train masha duro mes pa trece cambio den esaki e aña aki. Ta na algun ocasion so por wak cu Venezuela a cay den premiacion y te hasta Aruba den 2 ocasion, cual tabata den aña 2014
E aña aki, e torneo aki lo tuma lugar na Aruba. Esaki lo cuminsa diabierna awo, 11 November pa 10or AM. E prome weganan lo ta e mix doubles y pa 5or PM e prome weganan di doubles men & women lo cuminsa. Diasabra 12 November lo continua pa 10or AM cu quarter finals den mix doubles y pa 5or PM lo tin e weganan di semifinal den men y women doubles. E semifinal di mix doubles lo tuma luga diadomingo 13 November cuminsa pa 10or AM. Tur e weganan aki lo tuma lugar na Beach Tennis Aruba Club situa net banda di Tropicana Hotel.
E final mes di cada categoria lo cuminsa diadomingo 5or PM pero e biaha aki nan lo tuma lugar riba Eagle Beach, riba center court, cu ta wordo prepara pa e evento di mas grandi den e mundo di Beach Tennis, cual ta e Aruba Open ITF Tournament, cu lo cuminsa su dialuna siguiente esta, 14 November 2016
Un invitacion ta bay pa henter e pueblo di Aruba, pa ta presente, entrante diabierna awo, na Beach Tennis Aruba Club na Tropicana pa asina aki apoya tur e participantenan pero principalmente nos ekipo di Aruba. Nos ta warda boso sin falta.
Pa cualkier informacion adicional por subi riba nos facebook page https://www.facebook.com/beachtennisaruba/ como tambe riba nos website http://www.beachtennisaruba.com/ of riba e website di ITF http://www.itftennis.com/beachtennis/home.aspx