Directora di Stichting Monumentenfonds, Anne Witsenburg, a splica cu pa por drecha un edificio cu ta un monumento, mester haya un huurdo prome pa esey.
E ta sigui splica cu si nan por cumpra un edificio, restaur’e, nan mester di un huurdo, pa mira sigur cu nan tin entrada den futuro, manera ya indica. Awor nan ta buscando huurdo y si hende ta interesa pa huur cierto edificio despues di restauracion, por cuminsa delibera, wak kico ta kico y despues desaroya e edificio.
Tur proyecto ta tuma varios aña. Por ehempel e faro, a dura mas cu cuater aña pasa, te cu awo ta cla. E edificio net dilanti di Staathuis a bay relativamente lihe, aunke cu tin cu bisa cu tin hopi placa y tempo inverti den dje. E reunion cu a haci cu e famia hunto cu e minister, tabata un paso hopi grandi, pasobra henter e famia a duna su aprobacion pa bende e edificio ora cu tin un huurdo. Pero te awor aki, no tin un huurdo.
Ningun banco lo bay financia Monumentenfonds pa un proyecto si no ta sigur cu por huur’e. Pa henter e famia uni na e plan aki, esta pa loke ta e edificio den Wilhelminastraat (ex Papiamento Restaurant), ta hopi importante. Pa haya un suma vast, esaki tabata hopi importante tambe. Tur esaki ta pasonan cu ta bay yuda Monumentenfonds, den 2 pa 3 aña posiblemente pa desaroya e edificio.
A pidi un grupo di studiante cu a bin pasantia no mucho tempo pasa, pa traha un plan pa e funcion temporal di e edificio en cuestion. Pa haci algo cu por cuminsa awo, segun Witsenburg.