Maestronan di Scolnan Basico di Aruba ta hopi contento cu e introduccion di e “Kerndoelen Methode”. Cu esaki kier pa tur scol ta riba un mesun linea pa loke ta e vaknan di Rekenen Wiskunde.
Durante un sesion di training teni recientemente, e docentenan a duna di conoce cu nan ta hopi entusiasma cu e implementacion di e “Kerndoelen”. E aña escolar a habri y nan a bolbe sinta hunto pa haci un “follow up” y bay den profundidad.
Un di e docentenan cu a participa den e workshop pa maestronan tabata Juffrouw Germaine Tromp-Maduro di Colegio San Hose di Klas 1. El a señala cu aña pasa e maestronan a haya un introduccion di e “Kerndoelen” y e aña aki ta bay un tiki mas amplio.
Tabata un bon oportunidad pa intercambia informacion, puntonan di bista y a siña wak e cosnan di otro manera ademas di hinca bo mes den e sapato di e mucha, a bisa.
Juffrouw Ivirgna Hernandez ta docente na Maria Goretti College, el a duna di conoce cu e biaha aki a compara e metodo cu nan ta usando cu e “Kerndoelen”. Nan mester a saca afo si e ta suficiente of si e ta menos.
“Nos ta haya tips tambe cu nos por usa den onderwijs y cu por usa na un forma mas atractivo pa e mucha”, a señala.
Juffrouw Mayens di Commandeur Pieterboer School San Nicolas tambe a expresa su punto di bista relaciona cu e training aki. El a bisa cu Rekenen ta un vak unda tempo ta hunga un rol. Aworaki ta bay focus riba kico ta bayendo bon, kico no y pone enfasis riba tur. Mester wak unda e mucha ta haci su fout y mustr’e pero banda di esey mustre con mester ta.
E bon di esaki ta cu awor por mustra riba e fout pero traha riba dje. E ora ey e mucha ta compronde mas mihor, Juffrouw Mayens a subraya.
E aspecto di material tambe el a trece dilanti. Ta importante pa e mucha e uso di materialnan pa ilustra y pa asina e mucha por compronde mihor. E mucha no ta lubida si ta usa material pa yuda nan compronde matematica, a indica.
Finalmente, Juffrouw Mayens a laga sa cu e ta hopi satisfecho cu e training aki y e ta kere cu mester bin cune mas biaha. No solamente traha riba Rekenen so pero riba otro vaknan tambe. Cu esaki ture scol ta keda riba e mesun linea, “esey mi ta haya hopi importante”.