Pa firma liber e persona mester tin 10 aña legal na Aruba

DPL ta hunga un rol importante den e asunto di permiso, a pesar di cu cada departamento tin nan maneho. Sra. Kathy Paskel, directora di DIMAS ta splica tocante esaki.

E maneho di admision y sigur e parti di admision pa un hende por haya un permiso pa traha na Aruba, ta bay man den man cu e maneho di Minister di Labor. Hecho ta cu e minister di Labor tambe a anuncia un maneho nobo, entrante 1 di october. E dosnan aki a bay paralelo, pa asina tin concordancia entre e diferente ministerionan, pa asina e manehonan por core bon cu otro.

Pa loke ta e cambio pa DIMAS, Sra. Kathy Paskel a splica cu mester un distincion, ya cu tin un trayecto di cambio di ley cu ta andando pa varios aña caba. Ta ser spera cu e ley nobo lo drenta na vigor dia 1 di december proximo. Esey no ta e cambionan anuncia hunto cu e minister di Husticia, ya cu esaki ta e cambionan di maneho introduci pa entrante 1 di november. E cambionan aki lo drenta na vigor dia 1 di November. Den caso cu e maneho cu a introduci cu ta cay mas beneficioso pa un hende cu tin peticion previamente aplica, e maneho ta conta pa e persona nobo tambe. Un maneho nobo ta pone un periodo pa e hende prepara y tambe e organisacion. E maneho anuncia lo drenta na vigor dia 1 di november. Otro siman ta calcula cu lo tin tur locual cu ta e maneho (Handboek Toelating) di DIMAS actualisa pa asina tur hende tuma nota di esey.

Diahuebs ultimo, DIMAS a anuncia diferente cambio den maneho pa loke ta e parti di admision. A anuncia maneho nobo pa locual ta desaroyo di pilar nobo economia basa ariba innovacion y conocemento. Esaki ta un maneho dirigi ariba personanan cu a bin sea pa contribui door di aporta ariba e parti di innovacion, nan ta bin pa traha apps, videogame, of como start-up, dus un pilar economico nobo. Y un concepto cu ta haci e proceso aki posibel. Esaki ta bay den man den man un bon co-relacion pa locual ta e maneho di e minister di Labor. Otro cambio cu a anuncia ta e maneho special pa personanan cu tin necesidad special. Esakinan ta hopi biaha ta bin como mucha, forma parti di un famia na Aruba y ora nan bira mayor di edad, door di nan circumstancia, nan no ta bay traha ni tampoco sigui scol. Den caso cu ta wak cu ta hendann cu tin un limitacion, e maneho nobo ta haci posibel, e mayor bou cual e mucha special ta resorta, maske cu el a bira mayor di edad, por sigui pidi permiso pe. Esaki ta un maneho nobo, cu no tabata existi. Un otro maneho cu a keda introduci diahuebs, e ta mas concerni na e parti di proceso. Na mometno cu e entrega un peticion na DIMAS y e ta den evaluacion, ta ripara cu falta cierto papelnan, p.e. a entrega un paspoort vigente (no valido), e persona ta haya un carta y ta dun’e persona un cantidad di siman, pa coregi e fout aki, y ainda entrega e loke falta, pa asina procede loke ta e evaluacion final pa duna un contesta. Esaki ta pa evita cu ta bay over na negacion di forma rapido, pero den cuadro di servicio na cliente, ta dun’e oportunidad pa coregi foutnan chikito.

Loke a wordo anuncia ta un maneho pa personanan cu ta aplica pa un firma liber. Esaki ta un permiso cu hendenan ta haya despues di mas di 10 aña legal na Aruba. Den e caso aki, e minsiter a stipula e cuadro den cual un hende por haya un firma liber. E persona mester cumpli cu 120 luna legal, tambe inscribi na Censo y locual cu hopi biaha ta pasa ta cu hendenan no a pidi permiso consecutivamente y ta haya cu den algun caso, tin interupcionnan entre e diferente estadianan temporario previo. Aki e minister a stipula cu contal cu e interupcion no ta di 5 aña cu lo procede na duna e persona un firma liber. Tambe pa loke ta firma liber, den caso cu e persona no cumpli cu e maneho di minister, y el a haci un peticion di firma liber sin cu el a cumpli cu e cuadro cu e minister a stipula, DIMAS prome cu duna e nengacion final, nan lo haci si un asina yama Ambtshalve toetsing wak si e ta bin na remarca pa un permiso temporario. Si anteriormente e tabata tin un permiso como famia e ora por duna permiso como famia, pa asina acumula e cantidad di luna cu e falta, den e siguiente peticion si e por cumpli cu e norma stipula cu e firma liber.

Si e permiso previo tabata p.e. pa traha, e ora por duna oportunidad pa mustra cu ainda e ta trahando na e mesun dunado di trabao, mesun funcion y e ora lo procede di dun’e un permiso si e ta cumpli cu e rekisitonan pa un tempo cortico di p.e. 12 luna. Esey ta e dos cambionan cu a keda introduci pa locual ta hendenan cu ta aplica pa firma liber.

Comments

comments