E asunto di construccion di hospital nobo, ta un tema ariba su mes. Y tin tardansa den dje, y tin varios motibo pa esey. Sr. Ezzard Cillie, director di Hospital ta amplia.
Pa motibo di tardansa lo mester hala e fecha di apertura for di 2018 pa 2019, y ta purba na limita e tardansa, ya cu mas tardansa, ta nifica mas placa tambe, segun Sr. Cillie. E stap mas grandi cu hospital a tuma, ta cu siman pasa a cuminsa pasa e prome departamento cu pashent pa e tower nobo. Dus nan tin 3 departamento cu ta bayendo aworaki y nan ta spera cu pe siman aki ta e ultimo, unda lo cuminsa diadomingo marduga pa traspasa e ultimo departamento cual ta emergencia. Esaki ta bayendo bon.
E pashentnan ta hopi contento y nan ta entusiasma cu loke nan ta wak. Pa loke ta e entrenamento di personal, esaki ta bayendo na tempo, e ta hopi trabao pero tur cos ta bayendo na manera palabra. Pa otro siman diadomingo, e traspaso pa e edificio nobo lo ta cla, segun Sr. Cillie.
Mas aleu, Sr. Cillie a sigui bisa cu e personal di hospital ta ekipando e edificio nobo y esey ta cla, pero ainda tin mas ekipo ta biniendo ora cu e otro parti keda cla. Tambe nan ta bezig cu e proyecto di CatLab, cual ta bay dura dos aña. Mayoria di e tipo di pashentnan cardiologico ta bayendo afo aworaki, pero e intencion ta pa entrante fin di Januari, hospital lo ta full operacional cu nan CatLab nobo, cual kemen cu e pashent no mester bay afo mas, pero ta wordo trata akinan mas.
Pa loke ta e MRI, a bin poco tardansa, aunke a renob’e, lamentablemente den ehecucion di esey tabata tin un tardansa pa motibo di un fayo tecnico. Pronto esey tambe lo ta funcional, segun Sr. Cillie. Manera cu e ta funcional, ya cu hospital ta poco atrasa pa cu e afspraaknan.