Momentonan di alegria ta pa comparti cu tur hende, sigur cu nos grandinan. Pesey mes Minister President Mike Eman tin como tradicion, ya pa 15 aña, pa den e prome dia di aña hiba un dushi Dande na casnan di anciano rond di nos isla.
Eman ta pidi su amigonan musico manera Robert Maduro y tin biaha tambe e Rey di Dande di e aña pa compañ’e den un paranda cu e ta cuminsa pariba na SABA den Palisiaweg, San Nicolas. D’jey e ta pasa na Huize Maristella na San Nicolas y bin abou pa bishita tambe e grandinan di San Pedro y St. Michael Paviljoen.
Cu su casa Doina semper banda di dje, ademas di algun otro amistad, Prome Minister Eman ta drenta cada camber y sala di e centronan pa percura cuminda y desea cada habitante un Bon Aña repartiendo un cariño y respet sincero, manera nos grandinan merece.
Tur e Madushi y Padushinan ta ricibi Eman cu un sonrisa y brasanan habri. Nan ta expresa palabranan di gratitud pa e regalo bunita di musica y tradicion, pero tambe pa e atencion. Esun cu por ta lanta y dal algun paso cu e Premier riba tono di cancionnan manera ‘Abo So’ y otronan tipico cu cual ta deleita nan.