Pa locual ta 2020 y con esaki a funciona pa Centro di Control di Cacho, cual a wordo inaugura riba 1 di Juli 2020, aworakinan compara cu antes e ta un luga maneha, segun veterinario Irene Croes, na 2020.
Dus hende no por djis dump mascota aki mas y mester firma un formulario ora nan yega akinan pa duna nan motibo dicon ta bay deshaci di e mascota. Pushinan tambe ta wordo treci akinan apesar cu e ta un centro di control pa cacho. “Apesar cu e ta un centro pa cacho y nos ta purba busca segundo chens pa cacho, tog nos a logra rescata mas cu 25 pushi,” segun sra. Croes.
Mas cu 200 pushi a wordo poni drumi, a bini tambe un total di 228 cacho, un percentahe di 47% a wordo poni drumi, 53% a haya un hogar nobo, algun a wordo adopta na e centro mes y otronan a wordo adopta door di otro fundacionnan cu a haya un hogar definitivo pa nan, of ainda buscando un hogar pa nan. “Pa 2021 nos ta desea di por sigui conscientisa pa haya mas doño responsabel pa evita cu hopi cacho ta wordo treci akinan innecesariamente of cu hopi cacho ta wordo laga atras den mondi, pasobra esey tambe ta un trend nobo.”
E veterinario ta bisa cu compara cu antes, semper bo ta papia di miles di cacho y pushi cu ta wordo treci na Wayaca y wordo poni drumi, pues bo por bisa cu e cifranan tog ta mas abao pa mitar aña.
“Mester haci un encuesta si e otronan teoriticamente lo a bay wordo gedump den mondi si of no, esey ta riba plan tambe pa purba na haya sa,” segun e veterinario ta splica.