E asina yama “turismo estetico” cu a gana fama den e ciudad di Medellin, Colombia, a cobra un victima mortal nobo e siman aki, despues cu a conoce e fayecimento di Mariody Murillo, un muhe di 44 aña di edad, cu a perde su bida despues di a haci un liposuccion dia 18 di juni ultimo.
E muhe, cu a fayece dia 25 di juni ultimo, a biaha un siman prome cu su morto for di e municipio San Carlos, oost di e departamento di Antioquia, te n’e capital di e entidad aki, Medellin, pa realisa e cirugia estetica, El Colombiano a reporta.
Segun e medio, e victima a wordo opera den un praktijk gehuur di clinica Leon XIII door di un dokter particular cu nan no a identifica. Despues di a sali bon di e cirugia plastico, e muhe a cuminsa cu su postoperatorio na cas di un famia.
Algun dia despues, ora cu el a acudi na consulta pa su prome revision, dia 21 di juni, e dokter a detecta un posibel anemia y a mand’e reposa na cas di su famia na Medellin, pasobra e tabata core riesgo pa empeora si el a bolbe su cas na San Carlos, tres ora leu.
E dianan siguiente lo a sigui sin a sosode nada en particular, pero pa 5’or di mainta di dia 25 di juni, Murillo a bira malo y mester a hib’e di emergencia n’e clinica Las Americas, luga caminda el a fayece pa 6’or y 16 di mainta, despues di e esfuersonan medico pa purba salb’e. Te asina leu, ta spera e resultado forense pa conoce motibo di e morto.
E morto di Murillo, cu tambe tabata sufri for di cuater aña pasa di presion halto, a causa shock na San Carlos, pasobra e tabata basta conoci y aprecia p’e comunidad, debi cu e tabata realisa labor religioso como secretaria di e parokia di Nuestra Señora de los Dolores.
Otro morto similar
Di acuerdo cu e reporte di e medio, Murillo t’e di cuater muhe cu a fayece den 2024 despues di a somete na cirugia estetica na Medellin.
Algun di e victimanan tabata Erica Zapata, di 50 aña di eda,d kende a muri dia 25 di februari ultimo, a penas 10 dia despues cu a realisa un abdominoplastia y liposuccion. Algun momento prome cu el a muri, e muhe a presenta calamber na su pia robes y mareo y convulsion.
Na april, otro muhe di 57 aña a muri durante un sesion di tratamento di escleroterapia pa elimina spataders. E victima a bira malo durante e procedimento y aunke a purba di reanim’e, el a fayece n’e luga.
Turismo estetico
E tratamentonan estetico na Medellin a yega na un punto cu persona di otro ciudad y di otro pais, ta biaha ‘e ciudad aki bao di e fenomeno conoci como turismo estetico.
Di acuerdo cu El Colombiano, ta existi “agencia sin escrupulo” dedica na ofrece pakete di biahe cu ta inclui cirugia medico, hospedahe y hasta actividad di entretenimento. Es mas, haciendo un buskeda riba Internet di “turismo estetio na Medellin”, ta aparece un dozijn di centro cu ta ofrece e servicionan aki.
Segun e medio, e ofertanan estetico ta sconde practica sanitario ilegal, cu procedimento kirurgico cu ta wordo realisa di forma clandestino na hotely cas particular, sin permiso medico ni garantia, motibo pa cual ta pidi e ciudadania pa evita e practicanan aki y busca profesional certifica y hospital conoci.