NEW YORK, Merca- Ta trata aki di Scott Michael Johnson, cu tempo di e atakenan tabata tin 26 aña. E tabata traha den di 89 piso di e South Tower di e World Trade Center.
Na New York nan a logra identifica e restonan mortal di un di e victimanan di e atentado di 11 di September di 2001. Esaki ta despues di 17 aña purbando, sin exito. Pero danki na e avancenan den e analisis di ADN, e expertonan por a determina cu un muestra di weso haya den e ruinanan di World Trade Center tabata pertenece na Scott Michael Johnson, segun The New York Times ta informa. E tabata tin 26 aña y tabata traha di analista di siguridad den e di 89 piso di e South Tower di e World Trade Center pa e compania financiero Keefe, Bruyette & Woods, un banco di inversion specialisa.
Ta trata di e di 1642 victima identifica despues di e atentado di 9/11. En total den e ataque a muri 2753 persona. Durante tur e añanan expertonan a logra identifica al menos 22 mil fragmento di restonan humano haya na e luga despues di e ataque. Expertonan ta van plan di sigui cu e labornan cu nan ta considera un “obligación sagrado” pa cu famia di e victimanan.
E identificacion di Johnson ta importante, vooral pa e mayornan di e defunto, cu finalmente por caba cu tur duda riba loke por a pasa cu nan yiu. “Di algun manera, Semper mi a pensa cu e lo yega y bisa: ‘Atami’ki, mi tabata tin amnesia’”, su mama, Ann Johnson a bisa tocante di su yiu.