Sra. Aymara Arcay, un turista na Aruba di nacionalidad Venezolano kende ta pega na Aruba pa basta tempo pa via di e pandemia, a mira via medionan di comunicacion con prensa tabata Live dilanti di DIMAS diamars atardi dunando oportunidad na e dama Jacqueline Peñaz pa vocifera su preocupacion di necesidad di yudansa pa bay bek Venezuela. Sra. Arcay a sali core bini DIMAS pa purba di haya prensa eynan pa asina e tambe por splica su caso cu e ta pasando aden.
E ta splica cu el a bin na Februari pa bay bek den luna di Maart, e no por a bay bek den Maart pues e tin 8 luna pega akinan.
E ta ricibiendo sosten for di famia y amistadnan for di Venezuela, el a bay Warda Costa y tampoco por a haya un cupo. E ta riba e lista desde principio pa bay bek riba ‘vuelo humanitario’ pa Venezuela, pero e no a wordo yama ainda. E tin pa cubri su pasashi, pero su problema ta cu no tin comunicacion, e no ta wordo yama of notifica. Sra. Arcay ta reclama riba falta di organisacion den DIMAS.
E dama no sa mas kico pa haci, e ta warda riba email, notificacion no ta drenta, ningun tipo di comunicacion, y e djis kier bay bek su pais y no kier perde e vuelo pasobra e no tin manera con pa sigui biba akinan. Ta dificil e keda biba akinan bao di e circumstancianan cu e ta aden na unda e ta bisa e no por ni traha anto esaki tampoco ta wordo facilita p’e. El a purba busca trabao si pero sin ningun resultado. El a bin manera turista, dus ni suficiente paña of placa e tin pa maneha su mes akinan. E no ta conoce casi ningun hende na Aruba tampoco, ta entre amistadnan y familiarnan na Venezuela cu ta pone placa hunto y transferi esaki pa su persona akinan, e ta birando un situacion demasiado fastioso.
E dama a bay consulado pero e lista ta wordo coordina por medio di DIMAS, ta DIMAS ta pasa e lista na consulado. Pues e dama no ta compronde con por ta posibel cu e ta riba lista – y e tin prueba di esaki – y cu DIMAS supuestamente a manda email pero e dama no a haya esaki. E no kier perde e vuelo atrobe pa e bay bek su pais. E no mester placa, e ta preocupa riba e organisacion y con e comunicacion ta bayendo.
https://www.facebook.com/masnoticia/videos/1736979809786797/