Diaberna ultimo Fundacion Movemiento ta Bida a cera su programma “Hunto nos ta vence Enbehecimento” pa loke ta aña 2016. Aña pasa FMTB a haya ok di Samenwerkende Fondsen di Hulanda pa presenta e programa aki den 3 districto na Aruba. E programa ta specialmente pa hendenan di 60 aña bay ariba e ta completamente gratis. Dos dia den siman instructornan di FMTB ta duna les na tur esnan cu kier participa cu un variacion grandi di movemiento, canto, yoga, obranan di man, pintamento etc..
Actualmente Dakota, Santa Cruz y Tanki Leendert ta participa den e programa aki cu a resulta den un exito rotundo. Januari 2017 tur cos lo continua atrobe na e mesun luganan di semper. Algo cu ta masha straño ta cu mayoria di e participantenan ta hende muhe y FMTB ta haci un suplica na tur e hende hombernan pa bin join nos y pasa dianan hopi agradabel y social.
Durante e celebracion diaberna ultimo cada grupo a presenta un show chikito den ambiente di Pasco. Un danki ta bay pa Grupo Escala di Chichi Perez, Caha di Orgel “Ban Balia” di Padu y Francis Jacobs cu a entretene e participantenan.
FMTB ta gradici un y tur cu a yuda nos durante e aña 2016 y ta spera cu den 2017 por conta cu e apoyo di tur hende atrobe deseando un y tur felis dianan di Fiesta.