Dialuna ultimo Fundacion Movemento ta Bida a sera su programma “Hunto nos ta vence Envehecimento” pa loke ta anja 2019 den Renaissance Ballroom full dorna den ambiente di Pasco. E programma aki ta worde subsidia door di Samenwerkende Fondsen di Hulanda den 3 districto na Aruba. Na Aruba CEDE Aruba ta controla e parti financiero di cada un grupo. E programma ta specialmente pa hendenan di 60 aña bai ariba y ta completamente gratis . Dos dia den siman instructornan di FMTB ta duna les na tur esnan cu kier partisipa cu un variacion grandi di movemento, canto, yoga, obranan di man, pintamento etc.. Actualmente Dakota, Santa Cruz y Tanki Leendert ta partisipa den e programma aki cu a resulta den un exito rotundo . Fuero di e gruponan aki tambe tin un grupo na CB Noord y ultimo Bubali Sport Club tambe a bin aserca. Pa loke ta anja 2020 FMTB ta sigur cu mas districto lo cuminsa cu gruponan 60+ y nos tei pa juda tur hende cu kier hasi algo positivo pa nos grandinan.
Januari 2020 tur cos lo continua atrobe na e mesun lugarnan di semper. Algo cu ta masha stranjo ta cu mayoria di e partisipantenan ta hende muher y FMTB ta hasi un suplica na tur hende homber pa bin join nos y pasa dianan hopi agradabel y social. Durante e celebracion dialuna ultimo cada grupo a presenta un show chiquito den ambiente di Pasco. Un danki ta bai na Tipico Palisia y Francis Jacobs cu a entretene e partisipantenan. FMTB ta gradisi un y tur cu a juda nos durante e anja 2019 y ta spera cu den 2020 por conta cu e apoyo di tur hende atrobe deseando un y tur felis dianan di Fiesta.