CIUDAD DE MEXICO, Mexico- E diputado local di iskierdista Partido Revolucion Democratico (PRD) Saul Galindo a wordo tira mata diahuebs. E asesinato a wordo cometi door di un grupo arma den e balneario di Puerto Vallarta, Jalisco.
Ta trata aki di e di dos crimen contra di un politico local cu a tuma luga na Jalisco den menos di un siman. Dia 24 di December Salvador Magaña, un lider ambientalista y coordinador di e partido Movimiento Ciudadano (MC) a wordo secuestra y asesina.
Saul Galindo, kende tabata aspira pa e puesto di alcalde di Tomatlan, tabata den auto cu su yiu homber ora cu el a wordo intercepta pa un grupo arma na altura di e pueblo El Mirador.
Al menos seis pistolero a somete Galindo y despues a tira e diputado, kende a fayece na hospital, segun un comunicado di fiscal local.
Yiu di e politico a sali ileso. Entre tanto, personal di Ministerio Publico regional a implementa un operativo pa localisa e presunto responsabelnan.
E agencia di noticia Spaño EFE a informa cu algun dia atras Galindo a registra su mes como precandidato pa e alcaldia di Tomatlan, municipio den cual ya caba e tabata alcalde entre 2013 y 2015.
Jalisco ta un di estadonan mas violento den e pais cu 1.218 asesinato pa 2017. Ademas e ta cuna di e asina yama Cartel de Jalisco Nueva Generacion (CJNG), cu a expande tanto na Mexico como na otro paisnan, incluyendo Merca, segun datonan oficial.
Fuente: https://www.univision.com