SANTIAGO, Chile- E pastor y ex- canceller di e Arzobispado di Santiago di Chile, Oscar Muñoz a wordo deteni diahuebs pa cinco presunto delitonan di abuso sexual, cometi bou di engaño y confiansa. Esaki a wordo informa pa e fiscal di e region di O’Higgins, Emiliano Arias. Ta trata di e prome pastor den su funcion cu ta wordo deteni den e pais.
Ministerio Publico di Rancagua a formalisa e caso y a decreta detencion preventivo pa e pastoor diabierna. Awo e tin un plaso di investigacion di 180 dia, segun e poder hudicial di Chile a bisa riba su cuenta di Twitter. Esaki ta e medida preventivo mas grave cu e Codigo Penal ta establece”, segun e fiscal, “si tin pruebanan suficiente”. El a sigura tambe mester tene cuenta cu e hecho cu ta pone pensa cu e “libertad di e acusado ta forma un peliger pa sociedad”.
Abogado di Muñoz, Gabriel Henriquez, a bisa periodistanan cu e strategia di defensa ta “colaborativo” y cu ta acepta e prizon preventivo, algo cu el a bisa, no kiermen cu “e ta acepta esaki como berdad of hechonan existente”, y cu a studia e hechonan di manera profundo pa “argumenta cu mas sentido e circumstancianan cu no ta parce cu no ta ahusta na e realidad”.
Segun e investigacionnan, al menos cinco persona ta victima di e pastoor. E hechonan a tuma luga den e ciudad di Santiago y Rancagua. Ademas, segun e fiscal encarga, tur e cargonan ta vigente, ya cu nan a pasa entre 2011 y 2012. E abogado, di su banda, ta di opinion cu dos di e casonan a vence caba.
Muñoz a presenta na januari di e aña den un autodenuncia na e Arzobispado di Santiago. “Den esaki, evidentemente, ta precisa hechonan cu awe a wordo formalisa”, e abogado a bisa tocante esaki.
E fiscal a splica cu e cinco casonan tin factornan en comun y cu tur e victimanan tabata menor di edad ora cu nan a wordo ataca sexualmente”. El a bisa cu tur e supuestonan sucesonan a tuma luga den e cas di e pastoor of di e supuesto victimanan, ora cu e tabata keda cuida di e muchanan “door di e confiansa cu el a genera cu e victimanan y nan famia”. El a bisa tameb cu entre e abusadonan tin famia di e pastoor y cu nan ta investigando e supuesto existencia di mas caso.
E fiscal a critica cu e acusado tabata canciyer na e Arzobispado, pa cual e tabata involucra den e investigacionnan riba acusacionnan anterior di abusonan sexual den Iglesia Catolico di Chile cu a termina cu e renuncia di tur e obisponan di e pais. “E tabata sa con pa maneha su mes y sigura su impunidad, pa su mes y lo mas probabel cu pa e otronan”.
Arzobispado di Santiago a manda un comunicado diabierna manifestando su deseo di colabora cu husticia.