TEXAS, Merca – Un inmigrante Hondureño a muri na Houston, Texas, mientras cu e tabata deteni door di e ICE, segun e agencia a informa den un comunicado.
Yimi Alexis Balderramos-Torres, di 30 aña, ta bou di custodia di inmigracion desde dia 6 di juni ultimo y dia 18 di e mesun luna el a wordo traslada pa un centro di detencion na Houston. Diadomingo ultimo el a wordo haya for di tino den su camber.
Segun e comunicado, e intentonan di e personal medico di ICE y di Servicionan di Emergencia Medico pa reanim’e tabata en vano y el a wordo transporta pa e hospital Memorial Hermann Northeast, unda el a wordo declara morto. “E causa di su morto lo wordo revela despues di a haci autopsia”, e texto ta bisa.
Di seis detenido cu ta muri
Dia 17 di mei, agentenan di e Border Patrol na El Paso, Texas a haya e Hondureño, pero el a wordo manda bek pa Mexico bou di e Protocol di Proteccion di e Inmigrante, duna cu hunto cu su yiu, e tabata wordo contesta ariba su peticion di asilo. Diez dia despues, Balderramos- Torres, e biaha aki sin su yiu, a wordo haya un biaha mas door di e Border Patrol.
Segun e comunicado, e Hondureño aki ya caba a purba drenta Merca na augustus di 2013. Pero el a wordo manda bek pa Honduras. Balderramos- Torres ta e di seis detenido cu ta muri den custodia di ICE desde 1 di october 2018.