Directie Scheepvaart Aruba (DSA) ta yama Bon Bini na Aruba na un otro drill ship, Maersk Valiant, cu lo ta yegando diadomingo awor y lo bay ancra pazuid di Aruba.
Esaki sigur ta un otro Proyecto grandi pa Aruba. E Drill Ship “Maersk Valiant” a sali di Golfo di Mexico pa lay-up na Aruba.
DSA ta un departamento gubernamental y ta resorta bou di e Minister encarga cu Transporte. DSA ta responsabel pa prepara y implementa ley nan maritimo pa asina garantisa e siguridad di e trafico maritimo den nos awa nan teritorial. Na April 2015, e Decreto Nacional cu ta stipula tarifa pa cierto actividad nan tuma luga den area nan designa den nos awa nan teritorial (LB ham tarieven en vergoedingen redegebieden) a drenta na vigor. A base di e Decreto Nacional aki por cobra ademas di ancra so tambe pa actividad nan di mantencion, transshipment y bunkering cu ta tuma lugar den nos awanan teritorial. Tur fondo ta destina pa pais Aruba. E Ordenansa Nacional cu ta regula tur actividad cu ta tuma luga den nos awanan teritorial a drenta na vigor na aña 2012. Ta trata aki di e Haven-en Redeverordening.
Manera ya ta conoci na aña 2013 a haci un estudio riba e futuro di e sector maritimo di Aruba, unda a keda conclui cu Aruba mester desaroya mas actividad maritimo pa asina por crea entrada nan adicional pa Pais Aruba. Un di actividad nan menciona ta e ancramento den nos awanan teritorial. Den cuadro di esaki e maneho di Minister di Transporte ta dirigi pa promove riba mercado internacional e posibilidad pa ancra den nos awanan teritorial creando asina entrada adicional pa Pais Aruba.
Aruba ta e unico isla den henter Caribe cu tin un area di Transshipment y un area di Mantencion designa. E area nan aki ta reconoci internacionalmente y ta poni riba mapa nautico. E area di Transshipment ta menos profundo y relativamente trankil. E area aki ta wordo usa pa barconan cu ta ancra y tambe door di barco nan cu ta translada carga di un barco pa otro. E area di Mantencion ta wordo usa pa barconan cu mester hasi reparacion y/of inspeccion.
Durante e ultimo añanan DSA a bin ta realisa diferente trabou nan pa asina mehora e servicio cu pais Aruba ta brinda y asina tambe contribui na nos economia. Mescos ta e caso di e otro 3 drill shipnan, Maersk Venturer, Pacific Meltem y Pacific Mistral, hunto cu Maersk Valiant no ta den operacion durante e temporada cu nan ta ancra den nos awanan teritorial. Nan a scoge pa bin Aruba pa motibo di e seguridad cu Aruba ta brinda. Aruba ta pafo di e zona di horcan y tin bon logistica, sin laga afor e hecho cu Kustwacht ta tene regularmente debido control nan den nos awanan teritorial.