Parlamentario Endy Croes ta hopi molestia cu locual a pasa siman pasa durante un poco yobida cu Aruba a haya. Hospital desde inicio ta un proyecto cu ta hole corupcion. Ken su proyecto? Atrobe di AVP. Pakico nan mester a desgracia Aruba di e forma aki? Desde 2013 oposicion e tempo aya a bay fuertemente contra e deal aki. SOGA na un manera hopi intransparente, fuera di tur etica y sin ningun clase di integridad mester bay responsabilisa su mes riba e desaster aki. Parlamentario Endy Croes por corda di un carta di Bouygues Batiment International (BBI) dirigi na SOGA hopi fuerte acusando SOGA di nan manera di proceder den e bidding pa Hospital. BBI cu a traha masha hopi Hospital rond mundo, tabata tin e mihor prijs y riba dje a duna un prijs cu un Guaranteed Maximum Price di 214 Miyon florin sin ningun meerwerk.
Un trabao mal haci
Toch SOGA a scoge pa e prijs mucho mas caro, esta di Arrellano (amigo di Bermelo) di alrededor Afl. 250 miyon florin unda cada meerwerk lo wordo cobra separa y awe Aruba ta stobando cu e deal corupto aki caminda e Hospital no ta cla ainda y lo costa pueblo casi 900 miyon florin dia caba di pag’e despues di 29 aña. Tur esaki sin un garantia di un prijs maximo y awe historia di e estafamento di pais Aruba ta skirbi. Constantemente problema cu diesel spill, boiler, cathlab, lift cu a cay etc etc y pa completa e obra un trabou mal haci unda awa a core manera riu den e hospital nobo cu poco awacero. Anto ‘Ainda Falta’ manera hinca den e slogan di AVP.
Proyectonan nobo
Den e proyecto kisas conscientemente, a lubida OR esta Operating Rooms (camber di operacion), ICU/MCU esta Intensive Care Unit y Medium Care Unit, Microbiology Lab, MER esta Main Equipment Room pa nombra algun. Tur esakinan ta bira proyectonan nobo unda Hospital a manda pidi un extra 100 miyon. Costo di tardansa mester paga 15 miyon florin. Pueblo mester bay paga 30 miyon florin pa lease di e Hospital aki pa 29 aña largo cual ta laba laba 900 miyon florin.
Reunion urgente
Parlamentario Endy Croes ta bisa cu e cos aki ta dimas y lo pidi Presidente di Parlamento Ady Thijsen pa un reunion publico e siman aki mes cu caracter di urgencia. Lo yama Staff di Hospital, Board di Hospital, SOGA y AIB pa asina pueblo por haya sa e berdad y un investigacion lo bay determina kendenan ta hinca deep deep den e dealnan corupto aki y nan lo mester carga nan responsabilidad. Pueblo no por keda sali chambon cada bes y Mike Eman y amigonan ta keda bira miyonario. Nos lo pospone y para tur otro reunion pero esaki tin prioridad e siman entrante, Croes ta termina bisando.