Diabierna mainta, pa 9′ or di mainta, un oficial di polis durante su patruyahe di rutina a dicidi di bay tuma nota di un situacion cu el a constata riba pagina di Facebook, Animal Abuse Report Aruba. Aki riba nan a comparti un caso di maltrato animal, na e adres
Isaac Wagermakerstraat 109-B.
Riba nan pagina di Facebook nan a post algun potret di un cacho pafo di e cura di e adres en cuestion. E cacho tabata mara na un cadena di mas o menos 2 meter, sin cu e animal tabata tin un luga pa e sconde, sea contra solo of awasero.
Un oficial di polis, cu a tuma nota di e situacion comparti riba Facebook, durante su patruya a bay na dicho adres. Na yegada di patruya no tabata tin ningun hende na cas. Si oficialnan di polis por a constata cu e cacho tabata mara, pero e tabata riba un caminda di tera, cual eigenlijk ta un caminda pa auto pasa. Enberdad, e cacho no tabata tin luga pa sconde, ni contra ni awasero ni solo y e agentenan a dicidi di los e cacho. Central di Polis a wordo poni na altura di esaki.
Nota: Pa mas o menos 12 ‘or y mei, patruya un biaha mas a dicidi di pasa na e adres ya menciona. E biaha aki si e doño tabata na cas y e oficialnan di polis a combersa cun’e. E doño, cabayero di fam C., a declara na polis cu e dia prome su auto a daña pafo di su cura, pa cual el a dicidi di mara e cacho pafo pa asina e cacho cuida e auto p’e. (Testigonan ta nenga esaki y ta bisa cu e cacho ta mara eynan henter ora). C. su atencion a wordo hala ariba e maltrato di cacho aki y el a priminti di pasa e cacho bek p’aden di cura. E oficialnan di polis lo keda monitor e situacion aki.
Foto cortesia di pagina di Facebook di Animal Abuse Aruba