KINSASHA, Rep. Democratico di Congo- Otro brote di Ebola a wordo registra den e Republica Democratico di Congo y ta den desaroyo for di weekend ultimo. Esaki a wordo informa door di e Minister di Sanidad di e pais, segun AP.
Pa diahuebs, shete persona cu e keintura hemoragico aki a wordo hospitalisa den e ciudad di Bikoro. Otro cuater caso nobo di contagio y un morto door di Ebola a keda confirma den e localidad di Ikoko Impenge. Tres nurse ta entre e personanan infecta.
Ilunga a bisa cu den fin di siman a registra 17 morto sospechoso, pero te na e momento aki, no a wordo atribui definitivamente na Ebola. Sin embargo, segun Ilunga, e situacion ta rekeri di un respuesta inmediato y energico.
Tabata un aña pasa, cu e directora general di Organisacion Mundial di Salud (OMS), Margaret Chan, a declara cu “cientificonan no sa ainda cu exactitud na unda precisamente den naturalesa e centro di e virus di Ebola ta scondi”. El a calcula cu “otro epidemia ta inevitabel”. Segun datonan di Chan, esaki ta loke tur e expertonan ta comparti.
E epidemia anterior a tuma luga na Sierra Leona, Guinea, Liberia y algun region di e paisnan bisiña, entre añanan 2014 y 2016. E tempo ey e virus a cobra mas di 11 mil bida.