Tin diferente proyecto cu Otmar Oduber a eherce durante e añanan, pero tambe tin un gran cantidad den fase avansa cu el a bay laga atras. Hopi di nan cu tin “project dossier” y fondo ya presupuesta pa nan.
Proyectonan pendiente
Por pensa riba entre otro Paradera Corridor cual fondo ta bin di TPEF, mehoracion di beachnan cu mester continua, embeyecemento dilanti hotelnan cu ta un proyecto cu ATA ta haciendo hunto cu DOW. Tambe tin rapportnan cu mester traha riba coriente di lama cu ta perhudica hopi di e beachnan dilanti hotelnan esaki ta un proyecto ya aproba pa di e forma aki DOW por perhudica pa un rapport adicional. Na Zeewijk, Cura Cabay tin e proyecto grandi di e pier di piscadonan unda cu tin ampliacion como tambe un centro pa nan por bende pisca, warda ekipo di trabou etc. Cu esaki Noord Cura Cabay ta haya nan beach completamente drecha pa loke ta e santo, ta pone parkeo, kiosco y baño. A laga placa atras tambe pa adkisicion di truck di awa pa Santa Rosa como tambe e proyecto di awa cu WEB y Parkietenbos pa nos agricultor y criadonan di bestia. Pa cual tabatin combersacion cu WEB caba pa bin cu tarifa special pa nos criadonan di bestia. Mester menciona tambe e comision cu a wordo lanta pa loke ta e“Tax-Holiday” pa sector primario pa sigui impulsa pa mas hende haci agricultura, cria y pesca.
Nicolaas Store tambe a caba di wordo pasa pa FMA cu fondonan aloca. E monumento protehi aki lo bay bira e cas nobo di e Community Museum. Pa loke ta Mainstreet San Nicolas y Promenade, tur cos ta cla tambe pa e trabounan cuminsa e aña cu ta bin. ‘Kiermen tin cantidad di proyecto grandi di cultura, enseñansa di cultura y e proceso di archiva cultura andando’.
Mester menciona di e privatisacion y independisacion di Directie Scheepvaart tambe cu lo por bay produci hopi mas placa cu ta produci aworaki. E aña aki so a cobra for di e barconan cu ta para afo mas di 3 miyon florin, cual ta haci cu e departamento por ta full independiente for di fondonan di gobierno y pues ta bon pa wordo privatisa. “E proceso aki a cuminsa y ta spera cu sigui”. Na Departamento di Transporte Publico (DTP) ta bezig cu digitalisacion cu a tuma luga, proyecto di radar na ANSA cual pa otro aña mester ta “in place”. Esakinan ta algun di e proyectonan cu Otmar Oduber ta pusha pa e departamento keda pusha y continua cun’e hunto cu e Minister cu bin asumi e responsabilidad.