Tin diferente combersacion ta tumando luga y manera Otmar Oduber a splica desde e anuncio cu e lo forma parti di eleccion 2017. Un gran cantidad di combersacion ta tumando luga y ainda ta tumando luga, caminda cu ta acercando diferente persona den comunidad y tambe diferente persona ta acerk’e pa mira e posibilidad pa por uni pa loke ta e plataforma cu ta wordo crea nobo aki pa e proximo eleccion. Den esaki en berdad, mirando cu matutino Diario a saca un informacion, Oduber en todo caso a bisa cu lo tin tur transparencia cu ta posibel den politica nobo cu kier tin pa Aruba y en berdad, combersacionnan a y ta tumando luga cu sr. Bikker. Bikker ta un persona cu fuera di cu e conoce pa hopi aña, ta un persona cu pa hopi aña ta debati tambe den parlamento di Aruba y tin cu bisa cu su persona y Oduber mes, cu hopi respet pa otro, a atende puntonan tin biaha na un forma fuerte den debatenan cu ta tuma luga, pero tin cu bisa cu sr. Bikker semper ta uno cu tabata haci su preguntanan al caso durante tratamentonan di presupuesto na un forma pragmatico, no ta haci politikeria rond di e preguntanan. E ta uza su tempo hopi bon, contrario na otro miembronan di parlamento cu hopi biaha accion ta trece reaccion, door cu ta bay den direccion caminda cu ta haya cu ta desvia pa contesta riba e nivel cu e preguntanan ta wordo haci.
Sr. Bikker tabata semper hopi al caso. Despues cu a hiba e prome combersacion y cu a bay na e di dos combersacion, a papia di e interesnan en comun cu tin, con ta mira e prioridadnan pa futuro, pa e futuro generacion di pais Aruba y tin cu bisa te cu awor aki, combersacionnan ta uno sumamente habri entre Bikker y Oduber y den e dianan nos dilanti tin cu evalua si tin un base suficientemente amplio y fuerte pa bisa cu conhuntamente lo por haci un diferencia pa futuro y esey ta e combersacionnan cu a tuma luga y ta tumando luga cu sr. Bikker y tambe cu un gran cantidad di otro personanan den comunidad.
Oduber a sigui splica cu na e momentonan aki, loke kier inventarisa cu e pensamentonan cu tin,e vision cu tin pa futuro, ta uno cu ta coincidi entre su persona y Oduber, su organisacion y por ta e vision cu Oduber tin pa e organisacion cu a papia nobo di dje, pa mira cu ta crea un plataforma. No ta cuestion di un partido di un persona of partido di un lider. Ta un plataforma nobo cu ta wordo lanta na e momentonan aki y cu a haya interes cerca hopi hende cu ta combersando riba nan. E topiconan ta importante pasobra a base die topiconan di prioridad ta fiha tambe un programa di e plataforma aki pa futuro y esey ta loke ta combersando na e momentonan aki.
E pregunta ta si a combersa cu Bikker cual ta si. Asina combersacionnan ta tumando luga cu politico y no politiconan den comunidad y na final, mirando cu ainda combersacion ta tumando luga, ta prematuro si awor aki bay bisa den ki forma ta mira cu lo por traha hunto.
Naturalmente, si ta pensa riba un plataforma nobo pa futuro, e plataforma aki mester tin un forsa. E slogan ta bisa cu ta canando cun’e, esta forsa nobo y naturalmente lo kier pa tur esnan cu ta stima e pida baranca aki, cu tin e pasion pa traha pa nos pueblo y pa cambionan cuminsa tuma luga riba terenonan cu a coincidi di biaha, cu ta e parti di husticia,e parti di criminalidad riba nos isla, cu tin cu wordo atendi, no solamente cu man duro, pero mester wordo atendi cu tin comunicacion y partnership den comunidad pa por logra e diferencia. Pero tambe temanan manera educacion, scolnan, con ta incentiva, con ta duna e materialnan necesario, e capital humano di maestro y maestranan pa nan por keda motiva cu e trabao grandi cu nan tin pa guia y lanta e futuro generacion di nos pais, pero tambe hopi biaha fungi tambe practicamente mayornan di scol, di e muchanan cu ta pasa mas tempo hopi biaha cu nan cu e propio mayornan ta pasa cu e muchanan na cas, Oduber a splica.
Den politica, Oduber ta bisa cu si berdad ta traha cu un vision, si di berdad ta traha cu un pasion grandi, tur politico riba su mes mester ta un lider. Ta lider di un grupo di hende cu ta vota pabo. E hendenan no ta bay y nan ta vota por ehempel pa partido MEP of AVP. Nan ta vota pa 29 candidato. Nan tin confiansa den bo persona, den e organisacion, kiermen bo mes ta un lider riba bo mes na momento cu hende ta vota pabo.
E mentalidad ey ta netamente esun cu kier cambia, cu ora ta forma parti di un lista politico, un color politico, esey kiermen cu esey ta bay dilanti. Como lider mester defende e interes di e comunidad, di e pueblo. Di esun cu ta vota pabo, di esun cu eigenlijk den cuadro di constitucion, escogebo pa bay respresenta den Parlamento, cual ta e cas di pueblo. E mentalidad ey ta loke kier cambia.
Un partido politico nobo, un forsa nobo aki na Aruba, un plataforma nobo, mester ta compone door di varios lider cu ta carga e confiansa di comunidad pa haci un diferencia den futuro y esey ta e plataforma cu Oduber ta mira y intenciona pa futuro.
Oduber a sigui splica cu no necesario e partido mester tin 29 candidato. Kier bay cu candidatonan cu sa cu ta representa e cambio cu tanto nos pueblo ta anhela y cu naturalmente e plataforma ta envisiona pa futuro. Necesariamente na e momentonan aki, Oduber lo ta guia su mes pa por logra 21 candidato riba e lista. Ta representa tambe e cantidad di asiento cu tin den parlamento, e ta representa cu en berdad e comunidad ta enfoca riba dje. Pero atrobe, den politica, experiencia cu e tin, ta hopi dificil pa bo premira of planea tur cos delanta. Kiermen na caminda lo mira con esaki lo desaroya. Nos ley ta permiti pa tin un of mas candidato y te na un maximo di 29 y den e margen ey lo mester pone un team hunto cu por carga e forsa nobo pa futuro pa por haci un diferencia den politica, segun Oduber.