Economista Ben Marapin a trece padilanti den un entrevista duna den media (Masnoticia) cu e proximo Gobierno cu bin di 2017-2021, no tin espacio pa haci luho mas. Sino mester atende cu resolve e problema di debe entre otro. Segun lider di Pueblo Orguyoso y Respeta (POR) Otmar Oduber esey ta e ‘liña cora’ cu ta core den henter e ‘Plan di Accion’. No tin espacio pa haci luho pa gobernacion, e unico espacio cu tin ta mehora calidad di bida di nos hendenan.
Locual cu sr. Oduber ta referi na dje cu mehoracion di calidad di bida ta encera percura cu costo di bida por wordo regula. Percura pa nos hendenan por tin un entrada mas digno cu por participa den un economia cu na final di dia e meta mester ta cu gobierno por haya su fondonan. Y cu prioridadnan di pueblo (no prioridadnan di gobernantenan), nos ehecuta plannan na interes di comunidad di Aruba. Esey ta e ‘liña cora’ cu ta core den henter e documento aki, caminda cu ta pone e ciudadano, e adelanto di e ciudadano y e beneficio di e ciudadano na prome luga. No na proyectonan cu gobierno ta kere ta prioridad.
Con lo logra esaki
Aki tin un Forsa Nobo cu a acumula informacion di comunidad di Aruba. Mester reduci bo gastonan dentro di gobierno, POR ta kere cu mester hacie na un forma cu ta automatisa e procesonan di gobierno caminda bo ta privatisa departamentonan cu no tin como meta pa ta un departamento di gobierno. Esaki ta e prome manera cu a demostra atraves di un Aruba Tourism Authority (ATA) Sui Generis y ANSA. Asina ey bo por sigui privatisa departamentonan, laganan funciona mas optimal pa comunidad di Aruba, na final ta e servicio cu nan mester brinda pa comunidad di Aruba ta e enfoke. Tambe crea un revolucion den bo economia caminda cu tur cu ta participa den dje, e trahadonan ta haya un adelanto. Pero cu tambe ta duna un espacio na esunnan cu tin cu inverti, doñonan di trabou, empleadornan na Aruba. Pa nan por inverti y circula e placa den bo economia di tal forma cu gobierno na final ta ricibi su ‘fair share’ cu por wordo inverti den e gran cantidad di otro fasenan/plannan manera educacion, infrastructura y salubridad (cu tambe ta importante).