Aña pasa den algun medio di prensa a wordo bisa cu Otmar Oduber lo ser investiga pero awe un otro minister a cay den e caso aki, pa cual a puntra Oduber su punto di bista.
El a splica cu den pasado a defende su nomber y di su famia for di persecucionnan politico na momento cu tabata den oposicion, na un forma hopi cruel. Kiermen, Oduber ta compronde sigur e proceso den cual entre otro e mandatario ta pasando aden y no mester na ningun momento ta complaciente of ta emocionalmente bisa cu ta un contrincante y ta contento cu loke ta pasa.
E ex mandatario ta kere cu ta algo cu el a bib’e. E sa exactamente kico ta pasando den e famia, cerca e yiunan cu ta bay scol, pasobra el a bib’e.
E otro parti di dje, cu ta e diferencia, ta e hecho cu e trabao di Plataforma Forza Nobo, ta pone nan posicion riba facebook, caminda cu a bisa cu integridad y confianza di un gobierno, mester wordo prevaleci y mester wordo cuida na tur momento. Na e momento cu tin un mandatario cu den su funcion ta wordo sospecha, den e caso aki di cualkier delito, ta hopi cla y e Gobierno, y esnan cu ta sosten’e den e caso aki, e minister mester huzga pa nan mes kico ta etico y kico ta moralmente permisibel.
Tin biaha den bida e aspecto moral ta hopi mas importante cu e aspecto di djis sigui un ley y ora bo ta den un posicion den e caso aki di un mandatario y ta wordo sospecha di algo den funcion di bo trabao cu bo ta haciendo, atrobe ta keda na e mesun persona, na e prome minister kende ta carga e responsabilidad di e gabinete y si no, na Parlamento cu ta esun cu ta apunta un mandatario, pa dicidi loke ta eticamente y moralmente posibel. Den pasado, a bisa na hopi ocasion, e motibo principal banda di naturalmente 9 punto cu a wordo poni na gobernador pa retiro di Oduber, tabata exactamente su principionan y tambe loke ta para p’e cu mester sosode na un forma cu e comunidad por tin confianza den su politiconan. Confianza den su Gobierno, confianza den su mandatarionan y hasta confianza den su Parlamentarionan. No tin un screening ainda legal, pa loke ta trata miembronan di Parlamento, contrario na ministernan si, cu tin un proceso di screening y tin cu cuestiona si esaki ta na momento di screen e minister, cu si e persona aki lo tabata ministeriabel si of no. Ta keda na e Gobierno na prome luga y esey tambe ta e meta cu tin pa e reunion cu lo wordo yama den Parlamento, pasobra na fin di dia, Gobierno ta esun cu ta sostene e mandatario y den e caso aki e discusion publico aki ta bon pa wordo hiba y no por evita pa e tuma luga, pasobra aki 5 luna y mey ta bay urna electoral y pueblo mester sa kende ta esnan cu e por confia. Pueblo mester sa kendenan ta esnan cu na un forma civico, etico y moral, por carga e responsabilidad di e comunidad aki p’adilanti.