Plataforma Nos Pais, por medio di su vocero Otmar Oduber a haci un jamada publico na Prome Minister pa su persona lidera e esfuerzonan pa trece tur hende hunto pa delibera, discuti y dicidi riba e gastonan halto di e aparato di gobierno.
No ta un secreto cu den nos comunidad, pero tambe serca e propio politiconan ta biba pa añanan largo caba un preocupacion pa cu e gastonan demasiado halto di e aparato di gobierno. Tur politico of partido den oposicion ta cla pa mustra riba e hecho aki, pero ora drenta gobierno, ta realiza con dificil esaki ta si no logra un concensus
“No ta cuestion di ataca e gobierno actual of di culpa nan pa e realidad di gastonan exahera dine aparato, paso e ta un mal cu a bin ta creciendo bai tur gobierno desde nos Status Aparte y awor ta momento pa atende cu esaki si nos kier respeta nos mes y gana e comfianza como Pais bek localmente y den exterior”, asina Otmar Oduber a duna di conoce.
“Prome Minister, si bo ta sostene of no, a haci un trabao excelente durante e pandemia di Covid liderando e team completo na nivel nacional y ta e mesun Liderasgo aki ta necesario pa por logra un Dialogo Nacional riba reduccion di e gastonan di gobierno cu e exito necesario y pesey a manda e carta aki pa su persona cu e peticion urgente pa carga e tespinsabilidad di den e rol aki di trece tur hende hunto”.
Pueblo mes lo husga ken si ta dispuesto pa carga nan responsabilidad en conhunto y ken no. Enfasis riba temanan manera:
1. Independisacion y privatisacion di departamentonan (elimina esnan ineficiente y innecesario, unifica esnan cu tareanan similar y di indole similar, cu e meta di crea eficiciencia, mas produccion y miho servicio).
2. Maneho efficiente di edificionan bandona y den ruina (capitaliza riba edificionan sin uzo y reduci huurmento di otronan) Ley den draft APF, Aruba Property Fund por ta un bon inicio pa esaki.
3.Reglamenta compromisonan a largo plazo di projectonan cu consequencia financiero (regla atravez di ley cu gobiernonan no por compromete e presupuesto pa un periodo mas largo cu e periodo di e Kabinete sinta. Mester un mayoria absoluto di parlamento)
4. Independiza e proceso y toma di decicion di Relacionan Humano (saca tur nombramento, aumento y proceso disiplinarion di empleadonan for di man di Kabinete/gobierno).
5. Formaliza e structura y componente di Kabinete nan (formatsie plaats tambe serca ministernan, reduci cantidad max di ministernan y creacion di departamentonan nobo).
6. Re-structuracion di e aparato di personal.
7. Responsabilizacion di Directornan y Hefenan (duna mas autorizacion y tambe responsabiliza personalmente pa asina crea mas eficiencia y produccion den departamentonan).
8. Creacion di un instancia den ley di Cost Control (pa asina crea “ratio” y “”margen” nan pa gastonan di operacion via ley).
9. Crea CONTINUACION y consistencia den maneho (creando eficiencia y miho produccion den maneho y projectonan cu na final di dia ta un forma di reduci gasto si e output ta mas grandi).
Oduber a termina haciendo un jamada na e sentido comun di henter nos comunidad pa sostene y crea e espacio pa un dialogo real por tuma lugar riba e tereno aki y cu por tuma e miho decicion nan, sin polarizacion di esaki.