Preparacion pa un bida profesional ta encera mas cu djis un estudio academico. Actividadnan extra curricular, dirigi pa propio studiantenan ta brinda un base mucho mas amplio pa un formacion mas completo posibel. Pa e motibo aki tambe, Universidad di Aruba ta orguyoso di e organisacionnan estudiantil cu ta activo y ta contribui na e comunidad universitario di Aruba.
Durante e ceremonia di Student Award, cu a tuma luga recientemente durante un celebracion den Aula di Universidad di Aruba, Rector Glenn Thode a presenta premionan pa representantenan di organisacionnan di studiante activo na Universidad di Aruba.
Tres organisacion a haya reconocimento special, esta Circle K di Universidad di Aruba, Toastmasters Club di Universidad di Aruba y tambe Studentenraad di Universidad di Aruba, SUA.
Pa Presidente di e Colegio di Comisarionan di Universidad di Aruba, esta Juri Nicolaas, e tabata un honor di por a traha di cerca cu e organisacion importante aki, cu ta representa interes di cada studiante di e instituto academico. A tuma tempo pa por a lanta SUA, pero una bes cu e conseho di studiante aki a bira un realidad, no tabatin nada cu a par’e di a bira un stem determinante pa cada studiante, di cada facultad. E obhetivo di SUA ta pa atende cu diferente asunto cu ta concerni studiantenan pa medio di representacion den tur reunion di facultad y comparti ideanan concreto pa hisa calidad di e trayectoria educativo na Universidad di Aruba.
Presidente di e Colegio di Comisario di Universidad di Aruba, Juri Nicolaas tabatin particularmente palabranan di elogio pa SUA cu ta representa interes di cada studiante. “Nos ta maneha e presion pa percura cu e instituto ta keda funciona y mira cu satisfaccion y orguyo, tur e reconocimentonan cu a keda presenta.” Tanto Thode como Nicolaas a reconoce e organisacion como uno vibrante cu ta un partner crucial. Y SUA ta activo henter aña. Banda di ta tene contacto regular cu dirigencia di Universidad di Aruba, a tene eventonan social, deportivo y a logra pa reparti e pago pa atende Universidad den dos biaha. Esaki particularmente despues cu a aumenta e prijs. E meta principal di SUA sinembargo ta keda pa uni tur studiante, tur facultad pa hunto haci di Universidad di Aruba, un comunidad uni.
Y SUA tambe tabata instrumental den establece e Toastmasters Club di Universidad di Aruba (TCUA). Y TCUA mesora a bira un exito grandi. Ta trata di un organisacion internacional pa debate publico y liderasgo. Y awor, TCUA ta para riba su mes, cu un participacion grandi, unda studiantenan ta haya oportunidad pa practica pa hiba nan debatenan den tanto e idioma Ingles como Hulandes, y traha riba nan habilidadnan di lider.
Finalmente, Dr. Thode a honra e organizacion Kiwanis Circle K di Universidad di Aruba. Kiwanis Circle K di Universidad di Aruba ta patronisa pa Kiwanis Club di Palm Beach. Circle K ta traha cu e mesun meta cu e club di servicio Kiwanis, unda ta enfoca riba servicio comunitario, sosten na comunidad pa medio di participacion directo y/of recaudacion di fondo.
Tur tres organisacion a demostra di por agrega mucho mas contenido na e bida academico y ta yuda na e formacion completo di un studiante, miembro di e comunidad di Universidad di Aruba y miembro di comunidad di Aruba.
E representantenan di SUA ta, Toastmaster Club di Universidad di Aruba y Circle K, respectivamente Tian Xie, Gabriel Boekhoudt y Kayla Haakmeester a ricibi e plakkaat y premionan, y a expresa nan compromiso pa sigui traha na interes di nan organisacionnan y tur studiante di Universidad di Aruba.