Vacunanan contra sarampi a salba bida di mas di 20 miyon di mucha den 15 aña, pero apesar di e disminucion di 79% di morto pa motibo di e enfermedad aki na mundo entre 2000 y 2015, cerca di 400 menor ainda ta muri tur dia pa motibo di e infeccion respiratorio aki.
Esaki ta loke Organisacion Mundial di Salud (WHO), Unicef, Aliansa Mundial pa Vacuna (GAVI) y e Centronan di Control y Prevencion di Malesa (CDC) di Merca, den un informe publica diahuebs.
En concreto, e organisacionnan di salud aki ta indica cu algun campaña masivo di vacunacion y incremento den e cobertura rutinario di e vacunacion contra sarampi a permiti salba mas of menos 20.3 miyon di mucha den e ultimo decada.
No obstante, e progreso tabata “desigual” y na 2015, mas of menos 20 miyon di mucha no a ricibi nan dosis di vacuna y mas of menos 134 mil menor a muri pavia di e malesa.
Na Republica Democratico di Congo (RDC), Etiopia, India, Indonesia, Nigeria y Pakistan, ta suma e mita di e muchanan no vacuna y 75% di morto pa motibo di sarampi.
“Logra pa e sarampi pasa pa historia no ta un mision imposibel,” Robin nandy, director di Inmunisacion di Unicef a señala.
“Nos tin e hermentnan y e conocimento pa logr’e. Loke ta falta ta e boluntad politico pa yega na cada un di e muchanan.”
Director di e Departamento di Inmunisacion, Vacuna y Productonan Biologico di OMS, Jean-Marie Okwo-Bele, di su parti, a cualifica di “inaceptabel” cu miyones di mucha ta perde nan dosis cada aña ora ta existi un “vacuna sigur y altamente eficas pa detene e propagacion di e sarampi y salba bida.”
El a recorda cu e aña aki e region di Americas a wordo declara liber di sarampi, loke ta supone “e prueba cu e eliminacion di e malesa aki ta posibel.”
E consehero delegado di GAVI, Seth Berkley, a señala di su banda, cu sarampi ta un indicador clave di e fortalesa di e sistemanan di inmunisacion di un pais y, cu demasiado frecuencia, e brotenan ta actua como prome advertencia di problemanan mas profundo.
“Nos tin mester un fuerte compromiso di e paisnan y di su socionan pa mehora e cobertura di inmunisacion rutinario y pa fortalece e sistemanan di vigilancia.”
E brotenan di sarampi ta sigui ta un serio desafio, organisacionnan di salud ta adverti.
Na 2015, a registra importante brotenan na Egipto, Etiopia, Alemania, Kirguizistan y Mongolia.
E brotenan na Alemania y Mongolia a afecta personanan mayor, loke ta subraya e necesidad di vacuna e adolescentenan y hobennan adulto cu no tin proteccion contra sarampi, OMS, Unicef, GAVI y CDC a indica.
Sarampi tambe tin e tendencia di plama den paisnan den conflicto of den situacionnan di emergencia humanitario debi na e desafionan di e vacunacion di tur mucha.
Aña pasa, a registra brotenan na Nigeria, Somalia y Zuid Sudan, di acuerdo cu organisacionnan di slaud.
Elminacion di sarampi den cuater di e seis regionnan di OMS na 2015 tabata e obhetivo global di e Plan di Accion Global pa Vacuna aproba pa e Asamblea Mundial di salud na 2012.
“Mundo a perde e oportunidad aki, pero nos por logra e eliminacion di e sarampi, manera nos a wak den e region di Americas,” e directora di CDC, Rebecca Martin a afirma.
For di 2000, cerca di 1.800 miyon di mucha a wordo vacuna contra sarampi mediante campañanan di vacunacion masivo apoya pa Unicef.
Fuente: NTN24