For di awe organisacionnan den Caribe Hulandes por aplica pa Appeltjes van Oranje 2018 di Oranje Fonds. E tema di e aña aki ta ‘hoben y socialmente comprometi’. P’esey Oranje Fonds ta en busca di proyectonan inicia pa personanan bou 35 aña. Nan tin cu compromete nan mes pa uni y inclui gruponan di hende (vulnerabel). Por registra te cu 29 di september riba www.oranjefonds.nl/appeltjes. Tur aña den luna di Mei, Reina Máxima ta haci entrega di premio den Paleis Noordeinde na Den Haag.
Tur aña e entrega di premio ta regarda un otro tema. Oranje Fonds ta gusta demostra cu hobennan tambe ta tuma iniciativa pa gara y soluciona problemanan den comunidad. For di esaki ta surgi iniciativanan bunita. Pa e motibo aki Oranje Fonds a scoge pa e aña aki enfoca riba proyectonan inicia pa e hobennan aki. Den esaki por pensa riba hobennan cu a start cu un proyecto pa confronta e problema di soledad bou nos grandinan of pa ofrece nan compañenan menos afortuna un miho chens den bida.
‘Nunca demasiado hoben’
Peter Douwes, director di Oranje Fonds: “Mas y mas nos ta topa cu proyectonan cu a wordo inicia pa hobennan. Ta surgiendo un energia social grandi pa yuda hendenan vulnerabel. E storianan aki merece pa wordo conta. Poniendo Appeltjes van Oranje e aña aki den luz di e grupo meta aki, nos kier inspira otro hobennan pa nan tambe haci un esfuerso pa yuda nan prohimo. Nunca bo ta demasiado hoben pa por haci un diferencia den comunidad.”
Criterio
E proyectonan cu kier yega na remarca pa gana un Appeltje van Oranje e aña aki, mester cumpli cu algun condicion. Un di nan ta cu e iniciador mester ta 35 aña of mas hoben, cu e proyecto mester enfoca riba uni y involucra gruponan di hende vulnerabel y pa usa boluntario pa yuda traha. Tur criterio pa participa ta riba www.oranjefonds.nl/appeltjes.
Premio
E Appeltjes van Oranje ta wordo entrega na tres iniciativa cu di forma exitoso ta uni diferente grupo di hende of cu ta percura pa hende bolbe participa den comunidad. Tur ganado di un Appeltje van Oranje ta ricibi un statua di brons, diseña pa Princes Beatrix, y un suma di placa di 15.000 euro. Tur aña Reina Máxima ta haci entrega di e premionan.
Oranje Fonds
Oranje Fonds ta sostene proyectonan social na Hulanda y e parti Caribense den Reino. Cada aña e ta aporta cu un suma di 30 miyon euro na miles di iniciativa cu ta percura pa hende topa otro, ta menos solitario, haya mas comprension pa otro y ta dedica nan tempo y esfuerso pa un prohimo. Desde cu el a wordo funda, Rey Willem-Alexander y Reina Máxima ta pareha protector di Oranje Fonds. E aña aki Oranje Fonds ta existi 15 aña.