Desde 2022, ta circula remedi falsifica pa diabetes den tur region na mundo, Organisacion Mundial di Salud (WHO) a adverti den un comunicado. Recientemente, e autoridad di salud a referi specificamente n’e hallazgo na Reino Uni, Merca y Brasil desde october 2023.
E preocupacion ta enfoca riba e remedi Ozempic, cu ta contene e principio a tivo semaglutide y ta aproba na Union Europeo pa tratamento di diabetes Tipo 2. E version falsifica parce ta identicamente n’e remedi real. Debi cu e produto tambe ta wanta hamber, ta prescribi cada biaha mas pa perdida di peso.
Sinembargo, e remedinan falso por ta no ta contene e cantidad adecua di e ingredientenan activo y por lo tanto por hiba na un descontrol di sucu cerca e personanan diabetico, WHO a señala, añadiendo cu tambe por contene otro ingrediente activo cu ta representa riesgo pa salud. WHO a pidi e dokternan, farmaceuticonan, e autoridadnan regulador y p’e publico ta atento. E organisacion a recomenda cumpra e remedinan solamente cu receta na botica y no online. Fuera di esey, e usuarionan mester sigura p’e escala di dosificacion den e pennan di insulina mustra corectamente, p’e label ta corecto y pa no tin eror ortografico riba e caha, e agencia di salud global a añadi.
