Despues di un periodo di 182 aña, e Ordo di e Soeurnan Franciscano di Roosendaal ta cabando cu nan mision na Corsou y Boneiro. E decision aki a wordo tuma debi n’e caida di e cantidad di soeur y nan edad avansa.
E soeurnan Franciscano a yega Willemstad, Corsou, na 1842, riba peticion di Obispo Monseigneur Martin Nieuwindt. E tabata kier mehora e bienestar di trahado riba e plantacionnan mediante educacion y conversion na catolicismo.
Un di e soeurnan a describi su impresionnan inmediatamente despues di a yega Corsou: “Na nos yegada nos a wordo atendi pa seis persona similar (miho bisa, catibo), tur mesun negro cu e Moronan (…). Mi ta sinti p’e pober hendenan aki, pasobra hopi hende ta trata nan ainda menos cu animal.”
SCOL
E soeurnan a funda un cantidad di scol y convento y a educa miles di mucha, contribuyendo significativamente n’e comunidadnan local.
Fo’i principio, e soeurnan a haci referencia pa mehora educacion den e districtonan pafo. E prome scol di Barber a wordo funda na 1847. Riba e isla di Boneiro, e prome scol a wordo funda na 1856 na Playa, Kralendijk y na 1864 na Rincon. A duna les pa prome biaha na Aruba na aña 1857.
Fuera di educacion e soeurnan tambe a proporciona un weeshuis desde 1858. Inicialmente den un cas na Otrabanda, pero na 1867 a pone e internaat nobo di Welgelegen den funcion. Fuera di esey, nan a funda un noviciado na 1842 den consulta cu Monseigneur Nieuwindt. E influencia di e soeurnan den e bida religioso y social tabata considerable.
Sclavitud
No tabata te na 1857 cu a introduci un “reglamentacion riba esclavo,” cu a stipula cu e “muchanan esclavo” menor di diescuater aña mester a asisti dos ora di educacion pa dia. E conclusion tabata cu, den practica, e educacion aki a tuma luga di 3 pa 5’or di atardi, despues di e dia escolar normal di e muchanan “liber”, cu tabata bay scol di 8’or di mainta pa 2’or di merdia.
Esaki tambe a nifica un carga adicional enorme p’e Soeurnan di Roosendaal, cu tabata enfrenta constantemente e falta di placa, edificio deficiente, klas super yen, scarsedad di material didactico y absentismo escolar.
Educacion den e districtonan pafo tambe tabata responsabilidad di e mision catolico. Te yega n’e rumannan, e Soeurnan tabata brinda educacion den e “scolnan pober.” (Scol di por nada).
Tambe nan a mira e necesidad di siña e idioma nacional, Papiamento. Na 1913, 81 porciento di tur e studiantenan di Corsou tabata asisti na un scol pa hende pober, segun Fred de Haas a publica riba e website Caribbean Letters.