BUENOS AIRES, Argentina – Corte Supremo Argentino a confirma diahuebs e orden di detencion dispuesto pa un hues contra di e ex presidente Cristina Fernandez, pa e supuesto tapamento di e Iraninan acusa di e atentado na un centro comunitario Hudiu na 1994, no esaki no lo por wordo efectua pa tin inmunidad parlamentario.
Corte Supremo di Husticia a rechasa unanimamente e recurso di keho presenta pa e actual parlamentario contra di e orden di aresto dicta pa e hues Claudio Bonadio na december 2017, cual ehecucion ta depende di e resultado di e peticion di inmunidad cual ya a wordo manda pa Parlamento, pero cu ainda no tin resultado.
Cu e firma di e cinco integrantenan: Carlos Rosenkrantz, Elena Highton de Nolasco, Juan Carlos Maqueda, Ricardo Lorenzetti y Horacio Rosatti, e Tribunal Supremo a rechasa e recurso doro cu e ta considera cu e no ta dirigi contra di un sentencia definitivo.
Ya e Tribunal di Apelacion a confirma e orden di detencion preventivo di e viuda di e ex presidente Nestor Kirchner (2003-2007), y cu door di esey el a presenta un recurso extraordinario den Corte.
E Tribunal Supremo diahuebs a rechasa tambe e difusion di keho presenta pa e ex hefe di Inteligencia Oscar Parrilli, otro acusado den e caso.
Fernandez, hefe di Estado entre 2007 y 2015, y varios miembro di su gobierno y otro colaboradornan ta wordo acusa pa supuesto encubrimento agrava, mediante un pacto cu Iran, di e ciudadanonan di e pais aki acusa di ta involucra den e atake ariba un centro comunitario Hudiu, cu a laga 85 persona morto y cual caso ainda ta sigui sin resolve.
E caso hudicial a wordo habri door di e denuncia di e ex fiscal Alberto Nisman na januari 2015 contra di e gobierno anterior, cuater dia prome cu el a wordo haya morto, cu’n tiro den cabes, den condicionnan cu ainda ta den corte y cu tur cos t mustra cu Nisman a wordo asesina.
Nisman tabata sigura di cu tabata tin un pacto registra entre Argentina y Iran na 2013, pa conhuntamente investiga e atentado tabata realmente pa sconde e sospechosonan di e atentado, entre cual e ex presidente Iran Alí Akbar Rafsanjani y e ex canciyer Ali Akbar Velayati, pa faborece e intercambio comercial bilateral.
Bonadio, cu ya caba ta encabesa otro causanan contra di Fernandez, a pidi pa detene e ex presidente, ya cu e ta considera cu e por stroba e caso. Fernandez ta sospechoso tambe den e caso conoci como ‘causa de los cuadernos’, unda cu ta investiga sobornonan entre empresarionan poderoso y personanan cu tabata tin puestonan halto den e kirchnerismo.
Sin embargo, su detencion lo depende di si su compañeronan den senado dicidi si nan ta vota of no, contra di dje.
E Camara Alta, den cual niun grupo tin e mayoria absoluto cu e coriente ideologico peronista, hopi dividi, lo mester dicidi si nan ta trata e peticion pa kita inmunidad na Fernandez, pa cual lo ta necesario dos tercera parti di e votonan den congreso.
E atentado contra AMIA, atribui na Iran y e grupo Chiita Hezbollah door di e comunidad Hudiu, tabata e di dos contra di e Hudiunan na Argentina, despues di cu 29 persona a muri na 1992, ora cu’n bom a explota dilanti di e embahada Israeli, tambe sin resolve ainda.