Diabierna, November 25, ‘Orange Aruba’, e campaña di concientisacion di Fundacion pa Hende Muhe den Dificultad a start sali y e no por tabata na un manera mas ehemplar. E evento a tuma luga na Fort Zoutman y e motibo ta basa riba su historia. Na aña 1798 Fort Zoutman a ser construi como proteccion contra di pirata y enemigonan. Subsecuentemente el a fungi como edificio di gobierno, warda di polis, prison y hasta un corte di hustitia. Tur su funccionnan ta tin di haber cu edificio nan cu como Fundacion ta haya nos mes confronta cune na un momento of otro pa cu e trabou cu e fundacion ta haci.
E evento a conta cu presencia di su excelencia Gobernador Interino di Aruba Sra. Yvonne Lacle- Dirksz, Vice-presidente di Parlamento Sr. Rene Herde, Minister di Asuntonan Social, Hubentud y Labor Sr. Paul Croes, Minister di Enseñansa y Asuntonan di Famia Sra. Michelle Hooyboer-Winklaar, Parlamentaria Varlack y tur e otro distinguido invitadonan di diferente organisasion y instancianan cu nos ta traha cu nan.
E anochi a cuminsa cu un rendicion a capella di Sra. Lilia Richardson sigui pa un discurso di presidente di Fundacion pa Hende Muhe den Dificultad, Sra. Suzy Kock. Sra. Kock a subraya e importancia di e trabou cu e fundacion ta eherce como tambe e motibo pa un campaña di e magnitud aki. ‘Orange Aruba’ ta ‘Orange the World’ pero ala Aruba. ‘Orange the World’ a cuminsa na 2015 ora cu Secretario General di Nacionnan Uni a haci un petition pa paisnan di mundo ilumina monumentonan of otro edificionan reconocibel e color oranje pa demostra cu nan tambe ta contra Violencia contra Hende Muhe y Mucha Muhe. Oranje ta simbolo di un comienso nobo mescos cu tur dia solo ta sali di nobo di tur sorto di color oranje. Violencia domestico ta un di e sorto di violencia cu ta ser cometi contra e ser femenino y cu ta prevalente riba nos isla. Pesey 16 dia di actividad pa concientisa nos pueblo di Aruba ariba e problematica aki como tambe duna informacion ariba con organisacionnan ta yuda mucha muhe, information riba Mensenhandel etc.
Minister Hooyboer-Winklaar tambe a hiba palabra vociferando su preocupacion pa cu e problema social di violencia domestico y di e trabou cu ainda falta riba e tereno aki. El a insisti cu ta hunto nos por trece cambio den e problematica aki. Minister Paul Croes tabata e ultimo orador y a papia ariba cu e no ta contento cu e mester atende un evento mas pa violencia domestico. Locual cu Minister Croes tabata kiermen ta cu violencia domestico no mester ta un problema asina grandi cu nos tin cu tin eventonan di conscientisacion grandi asina pa bin solucion. E tambe a pidi pa tur hunto traha pa yega na solucionnan permanente.
A pasa un video gradiciendo esnan cu semper a contribui cu Fundacion pa Hende Muhe den Dificultad. Seguidamente a tuma lugar e cendemento oficial di e luz oranje. Minister Hooyboer-Winklaar a cende e luz pa ilumina Fort Zoutman su toren y paden Minister Croes a cende search lights Oranje. Un momento sigur hopi bunita mientras Tino Ruiz a deleita un y tur.
E dianan cu ta sigui lo tin varios actividad cu ta gratis pa publico y e yamada ta bay pa cada un di nos pa atende e evento of eventonan cu mas ta atrae cada un di nos. Tira un bista riba facebook page di FHMDD y e schedule lo tey prominentemente.
Dialuna, November 28, lo tuma lugar un lectura duna door di CEDEHM ariba genero y igualdad. Abo sa kico genero kiermen of dicon igualdad ta asina importante? Bin scucha y haci bo preguntanan. Hunto nos por haci e cambio cu nos mester haci pa ningun dama y su yiunan mester pasa door di e tristesa di violencia domestico.
Un danki na Sonrisa pa a acepta di cater e evento.