Una bes cu bay den un empresa, sea construccion of cualkier otro tipo, cu constata cu algo no ta bay segun reglanan di e ordenansa di Siguridad y e dos veiligheidsbesluiten cu ta aplica, den prome instante, dependiendo di e seriedad di e situacion, nan ta haya sea un aviso, cu den tanto tempo drecha loke no ta bon, segun director di DTI, sr. Dominico Werleman.
Pero si ta algo cu tin peliger di biaha pa e trahado, e trabao ta wordo para na e momento ey. Den e forma ey ta actua locual ta trata siguridad na pia di trabao.
Depende e situacion e momento ey, con grave e ta, e ora ta haya sea un chens pa drech’e of e trabao ta wordo para di biaha. Awe DTI a para un trabao. Siman pasa a duna notificacion na doño di empresa pa cumpli cu cierto rekisitonan y awe cu a bay check, a mira cu esaki no a cumpli, pa e motibo ey a para trabao.
Den e forma ey DTI ta actua. Si ta algo cu tin peliger pa trahado, naturalmente no ta tuma chens y ta par’e di biaha.
Segun Werleman, hopi biaha ta depende, manera den caso di construccion hopi biaha e uzo di ekiponan di proteccion personal manera helm, sapato, coverall, etc. no ta wordo uza y ta duna nan prome instante cu den dos siman nan mester percura pa tur e hendenan tin e ekipo ey. Si esey no tuma luga, ta para e trabao, sea completo of den e seccion ey. Pero e siguiente biaha a ripara cu atrobe no ta cumpli, e ora ta para e trabao den full e infrastructura. E ora ta haya nan mes forsa pa cumpli cu e rekisitonan di DTI.