Glenbert Croes di Partido MEP a confirma cu un di e solucionnan di partido MEP pa alivia e pueblo di Aruba ta pa baha e prijs di awa y coriente drasticamente. Sr Glenbert Croes ta bisa lo siguiente:
“Partido MEP kier confirma na henter nos Digno Pueblo cu e decision di Gabinete Mike Eman 2 pa laga Valero establece e prijs di gasoline a base di “delivered price” cu a hisa prijs di gasolin drasticamente y no e “platts pricing” cu ta prijs di mercado, e Gobierno nobo di MEP lo revoke pa asina e prijs di Gasoline y Diesel baha drasticamente ademas di baha prijs di awa y coriente.
Door di kibra e contract di hedging, door di bay bek na e platts pricing, e Gobierno nobo di MEP lo baha prijs di awa, coriente y gasoline pa henter nos digno pueblo. Ora MEP baha awa y coriente y gasoline e lo ta un alivio grandisimo pa henter Pueblo.
Gabinete Mike Eman 1 y 2 no a importa nan e dolor y dificultad cu tur famia na Aruba tur dia, tur siman, tur luna ta pasa den dje cu un Aruba di AVP unda tur cos ta asina caro. E salarionan no ta yega. E pensioennan no ta yega. E onderstandnan nunca no a yega.
Door cu awa, coriente y gasoline ta asina caro na Aruba, prijs di tur cos a subi drasticamente. Ademas di e medida di BBO/BAZV di Gabinete Mike Eman, tur e medidanan aki a pone cu tur e prijsnan di cuminda tambe a subi drasticamente.
Placa no ta yega mas pa nos Pueblo biba. Ora bo mira cu e Ministronan ta haci y deshaci cu placa di Pueblo, Gabinete Mike Eman ta sigui gasta sin control y sigui haci debe y mas debe pa nan sigui gasta y Gabinete Mike Eman ta pidi Pueblo hala faha mara cu e medidanan cu nan ta tuma hincando nan man den cartera di nos Pueblo lagando e cartera di nos Pueblo na werki y bashí y sin puntra Pueblo.
E Ministronan di Gobierno di AVP: tur a enrikece nan mes pero empobreciendo henter un pueblo. Esaki ta un crimen cu gobierno ta comete contra un pueblo cu no por wordo pordona.
Henter nos digno pueblo a tuma su decision caba. E cambio real, necesario cu esperansa cu henter nos digno pueblo ta anhela ta wordo logra 22 di september proximo. Pueblo lo vota pa e unico partido di Pueblo, Movimiento Electoral di Pueblo cu nos compromiso pa salba Aruba nos pueblo y e futuro di nos yiunan”, sr Croes ta termina.