Oprah Winfrey cu donacion miyonario pa Puerto Rico

NEW YORK, Merca.- E popular presentado di television Mericano Oprah Winfrey lo haci un donacion di dos miyon dollar pa contribui na e reconstruccion di Puerto Rico. Esaki a wordo informa dialuna door di e Federacion Hispano, e organisacion Latino mas grandi na New York.
Según un comunicado di e organisacion, Winfrey a compromete su mes cu’n miyon dollar pa “Unidos”, e programa di rescate y recuperacion di e Federacion Hispano pa desaroya y implementa solucion na necesidadnan di largo plaso na Puerto Rico.
E otro miyon dollar lo ta destina pa e Fondo Flamboyan pa Arte, pa “proteha e coleccion artistico, cultural y creativo grandi di e isla”, segun e comunicado.
E fondo aki ta e resultado di un aliansa entre e gran compositor y actor Lin-Manuel Miranda, su famia y e Fundacion Flamboyan cu e meta di yuda conserva y sostene arte na Puerto Rico.
E ta apoya tur e facetanan di e comunidad artistico, entre nan musica, teatro, arte visual, baile, literatura y educacion artistico pa hobennan, cu e meta pa garantisa cu e arte y cultura sigui florece durante e reconstruccion di e isla.
“E dedicacion di Lin- Manuel Miranda di hiba Hamilton Puerto Rico y su apoyo na e comunidad cu a wak’e crece, a conmove mi asina tanto, cu mi tabata kier a uni mi mes na e esfuersonan di revitalisacion di e isla rico na cultura, beyesa natural y historia”, Winfrey ta bisa den e comunicado.
“E necesidadnan di Puerto Rico y nos conciudadanonan Mericano despues di e horcan feros (Irma y Maria) ainda ta hopi real. E trabao cu ya caba a wordo haci door di e Federacion Hispano, e Fondo Flamboyan pa Arte y otro organisacionnan tanto na e isla como pafo di dje ta leu di ta cla”, Winfrey a agrega.
For di 11 pa 27 di januari, Miranda a presenta su musical Hamilton den e Centro di Bellas Artes di Puerto Rico. Hamilton ta un musical exitoso di Broadway, protagonisa door di MIrando y cual fondonan genera a wordo destina pa e Fondo Flamboyan.
Ta calcula cu e obra lo genera 15 miyon dollar pa artista y institucionnan artistico ariba e isla.
E Federacion Hispano, organisacion sin fin di lucro, ta e institucion cu mas tanto donacion na e esfuersonan di recuperacion y reconstruccion di Puerto Rico, cu 30 miyon dollar na 110 iniciativa y gruponan comunitario, e comunicado a finalisa bisando.

Comments

comments