Ivo Valdes, di OPPA [Organisacion di Pensionado Publico Arubano] ta enfatisa cu ta nos grandinan a traha añanan largo, contribui na e pais aki, y no ta pasobra nan a yega nan ultimo fase di nan bida cu nan mester wordo trata den un forma cu nan no ta sirbi. “Nos ta lubida cu ta nos grandinan a cuida, produci, y te ainda nan ta haci esaki. Pues bo no por tira nan un banda”, sr.Valdes ta bisa.
OPPA ta di opinion cu e cuestion no ta cu bo ta bira grandi, pero con bo ta bira grandi. Mescos cu e situacion actual ta un reto pa gobierno debi na e situacion economico fragil, e pensionadonan tambe tin cu enfrenta e reto aki. “Tur luna nan tin cu wak kico tur nan por cumpra cu nan pension. Costo di bida ta altisimo na Aruba anto e ta priva nan di cumpra cosnan cu nan mester, e ora nan tin un lista di prioridad debi cu e cen no ta yega”, sr. Valdes ta splica.
Nos tin cu realisa cu berdad e grupo mas debil y fragil ta e grupo di pensionadonan cu tin na Aruba.
Na nomber di OPPA, nan tin dos pension, pero ey’fo tin un grupo grandi cu tin solamente un pension y esaki ta depende tambe di cuanto aña nan a biba na Aruba. Si bo no a biba di 15 aña bay ariba na Aruba, menos aña bo a contribui, menos bo ta haya na pension, y ta personanan aki ta netamente esunnan cu tin e mas dificil, segun OPPA.
OPPA a haya varios reclamonan di miembronan cu ta bisa cada bes AZV ta castiga nan, unda cu nan a perde varios derecho caba tocante e trato cu nan ta ricibiendo. “Bisa bo berdad, nos no por imagina nos sin un AZV mas awendia. Pero tampoco ta asina cu net e pensionadonan cu tin dos pension of un entrada extra, ta esunnan cu ta paga un prima super halto, mientras esunnan cu tin entrada grandisimo ta paga prima mas chikito pasobra nan dunado di trabao ta cumpli cu e diferencia”, sr. Valdes ta expresa.
P’esey tambe OPPA ta protestando y nan ta desea di sinta cu gobierno pasobra apesar cu nan a haya un rebaho di 100 florin desde 2018, segun OPPA esaki no ta suficiente: ‘pasobra bida ta birando tur dia mas caro.’