OPPA: Atraco ariba nos grandinan

ATRACO RIBA NOS GRANDINAN
Recientemente, den prome siman di februari, tabatin un atraco riba un señora grandi di 77 aña. Segun nos por a compronde cu ta di dos biaha cu ta atraca e señora aki. Tur 2 biaha e anti-socialnan aki, hendenan sin escrupulo, a horta placa di pensioen di un persona grandi. E unico entrada cu e persona aki tin!

TRATO PA CU NOS GRANDINAN
Kico ta pasando den nos comunidad?
Tur dia OPPA ta lucha pa duna e Adulto Mayo haya reconocemento y e balor cu e merece.
Mi no kier generalisa pero ta ainda tin hopi hende y instancia cu ta trata nos Adultonan Mayo na un manera inapropia.
Nos ta lubidad cu tur hende ta bira grandi. Nos comunidad y tur instancia tin e obligacion di duna nos hendenan grandi e balor cu nan merece.
Ta nos Grandinan a percura pa e comunidad di awendia y pa tur loke e generacion nobo ta gozando di dje.

BANCO
Na Aruba nos tin un Asociacion di Banco y mi opinion personal ta cu nos banconan mester ta mas cordial, sevicial y amabel (klant vriendelijk) cu nan clientela. Mas ainda cu e adulto mayo pasobra e adulto mayo tin un balor humano, social y economico pa e banco y pa nos comunidad.

OLINE BANKING
E Asociacion di Banco a dicidi cu mayoria transacion mester tuma luga “online”, via internet. Por ehempel no por paga mas cu check y paga cu placa cash tin gastonan agrega. E clientela a hay’e obliga di uza “Online Banking”.
Nan ta cobra nos pa tur deposito cu nos haci cu placa cash.

Awendia lanta un cuenta na banco, ta un proceso masha largo y cu yen di rekisito. Banconan por haci esaki bira mas facil pa e adulto mayo. Tur hende por siña traha cu un bancomatico. Mas ainda pasobra e ta un proceso cu cada bes e cliente ta keda ripiti ora di haci pago of lanta placa.

GOBIERNO
Gobierno di Aruba ta responsabel pa nos sociedad, ta p’esey nos ta apela na nos gobernantenan pa interveni ora cos ta bay malo, coregi unda ta posibel y aplica castigo unda cu tin mester. Ta p’esey nos ta acerca gobierno pa e atende e asunto di seguridad cu urgencia.

CASO DI AFL. 85,- DESDE 2013
Regularmente nos miembronan ta yama nos na oficina pa puntra nos con a para cu e caso aki. Lamentabelmente nos tin di contesta nan cu te ainda nos no a haya un fecha pa e caso bay dilanti hues.

MOCION DI 23 DI APRIL 2018 DI PARLAMENTO
Te ainda Gobierno no a ehecuta e mocion aki.
Esey kiermen cu e pensionadonan publico cu a bay cu pensioen despues di 1 di januari 2015 no a ricibi e asina yama “Bashi Premie” y “Gelijkbedrag”, cu den nos opinion ta sumanan cu nan tambe tin derecho riba dje, basa riba e principio di igualdad (“Gelijkheidsbeginsel”).
OPPA a manda carta pa Parlamento, Minister di Finanzas y Minister di Asuntonan General. E unico minister cu a contesta nos carta ta e Minister di Asuntonan General.

MINISTER DI DI SALUBRIDAD PUBLICO, CUIDO DI NOS GRANDINAN Y DEPORTE
Aña pasa OPPA a manda 2 carta (7 mei 2018 y 11 october 2018) pa e minister cu ta encarga cu e cuido di nos grandinan, pidiendo e minister pa sinta cu nos na mesa. Lamentabelmente te cu awe nos no a haya ningun contesta riba nos cartanan y tampoco nos a haya oido pa e peticion cu nos a haci.

ACTIVIDADNAN DI OPPA
Den luna di januari OPPA a tene dos dia di Charla tocante “Smartengeld” y Entiero. Den cooperacion cu APFA y Aurora Funeral Home, nos miembronan por a haya informacion tocante e suma “Smartengeld” y e Gasto di Entiero na momento di fayecimento.

FIESTA CARNAVALESCO
Comision di Actividad (CdA) di OPPA ta keda activo organisando un tremendo fiesta di Carnaval, cu e tema:
FANTASIA DI SOMBRE DI CARNAVAL.
Cada miembro por trece un introducido (di 18 aña pariba), sea nan pareha, un familiar of un amigo (a).
Entretenimento musical lo ta den man di Banda Musical OPPA y
J-Formation.

Desde diamars, 5 di februari 2019, a cuminsa bende carchi pa e actividad aki, na oficina di OPPA, Sabana Blanco 39.
Orario di oficina: 9:00 am te cu 12:00 pm.
Den oranan di merdia oficina di OPPA ta cera.
Ta bende carchi te cu diahuebs, 21 di februari 2019, si tin ainda.

Comments

comments