CARACAS, Venezuela- E ex alcalde metropolitanto di Caracas y lider di oposicion di Venezuela, Antonio Ledezma, a scapa di su pais, segun un famia di e politico a confirma na CNN.
Segun fuentenan di gobierno Colombiano, Ledezma a drenta Colombia via e ciudad fronteriso Cucuta, via e brug Simon Bolivar, pa mas o menos 6 or y 30 di mainta.
Den un comunicad, Migracion Colombiano, a bisa cu Ledezma a drenta e pais diabierna.
“Señor Ledezma a drenta teritorio Colombiano, via e Puente Internacional Simon Bolivar, di e poblacion Villa del Rosario, y a haci su tramitenan migratorio corespondiente na e autoridadnan Colombiano, conforme e normanan migratorio”, segun e mensahe.
Tin informacion cu lo tabata tin miembronan di Sebin pafo di e cas di e opositor.
No ta conoci con Ledezma por a sali for di su cas, ya cu su residencia tabata fuertemente controla.
Ledezma a drenta cu su passpoort y segun fuentenan di gobierno a declara, Ledezma lo biaha pa Bogota y despues pa Europa.
Den un combersacion cu Caracol Radio na Cucuta, Ledezma a manda un mensahe na su compatriotanan Venezolano y a anuncia cu e lo haci un gira pa Europa hunto cu su casa y su yiunan. El a agrega cu e tabata laga Maria Corina Machado na encargo di tur cos y cu e lo sigui lucha pa e libertad di Venezuela.
“No mester perde speransa, esey ta e gran virtud di e pueblo Venezolano”, Ledezma a bisa.
Secretario general di OEA, Luis Almagro, a manda un mensahe pa Ledezma despues di e haya e noticia di su salida di Venezuela.
E lider opositor, Maria Corina Machado a uni su mes na e mensahenan di Ledezma, bisando cu e tabata “sigur di cu Ledezma lo no a permiti pa nan haci’e un rehen di e tirania”.
E opositor a wordo aresta dia 19 di Februari 2014 ora cu forsanan di Servicio Bolivariano di Inteligencia a drenta su oficina sin un orden hudicial y el a keda deteni.
E tabata cumpliendo cu aresto domiciliario na su cas. E ta wordo acusa di conspiracion y tabata planea pa comete un crimen.
El a wordo poni bou di huisarrest debi na su estado di salud. Na Augustus 2017, el a wordo hiba pa prizon pa un temporada cortico, debi na un “inminente plan pa scapa” pa despues wordo traslada bek pa su cas, algun dia despues.
Fuente: http://cnnespanol.cnn.com