Internacional: Segun informe, e figura principal di oposicion Venezolano, María Corina Machado, a wordo deteni mientras e tabata asisti na e protestanan yama e dia prome di e inauguracion di e proximo Presidente di e pais Latino Americano. Segun fuentenan di oposicion y medionan relaciona, un grupo di personanan desconoci a basha e motocicleta di María Corina Machado abou y a tum’é den beslag.
María Corina Machado a wordo “intercepta violentamente” ora el a sali for di e manifestacion di oposicion, un dia prome cu e inauguracion tuma luga despues di e eleccionnan controversial na Juli ultimo, den cua e oposicion Venezolano, encabesa pa e candidato Edmundo González Urrutia , a afirma di a obtene e votonan ganado.
Su ultimo mensahe riba medionan social tabata un Tweet den cua el a bisa: “Esaki a caba. VENEZUELA LO TA LIBER.” E lider di oposicion, cu nunca a bandona Venezuela, tabata sconde pa cinco luna debi na menasa di circulonan di regimen tocante su detencion. E relato oficial di Comando Nacional di Campaña di María Corina Machado a declara cu “personal di regimen a tira riba e motocicletanan” cu tabata transporta e figura di oposicion.
Medionan di comunicacion Venezolano ta informa cu “17 motocicleta, drone y jeep a tira riba e motocicletanan cu tabata transport’e, tumbando nan, heridando un di e motociclistanan y hib’e cu n’e.”
E aresto – of “secuestro” manera oposicion ta describi – ta marca e prome biaha cu gobierno Chavista a durf di detene, y na un manera violento, e lidernan mas halto di oposicion na nan punto mas halto. Juan Guaidó nunca no a wordo aresta, y otro oponentenan, cu si a bay prizon, manera Leopoldo López, a wordo aresta – y “libera” – prome cu realmente a sostene un candidatura nacional.