Segun parlamentario Sr. Jeffrey Kelly, ta un tradicion den e actual campaña electoral, cu partidonan di oposicion ta trata di inventa kico cu ta, pa purba hinca Gobierno di AVP den bista malo pa cu e pueblo votado.
Esaki tabata e caso e siman cu a pasa ora cu un miembro di fraccion di MEP, a trata di compara apel cu peer riba e asunto di cantidad di cupo na scolnan MAVO.
“Aki un biaha mas pueblo por tuma nota cu ora cu argumento valido no ta existi, politiconan ta recori na observacionnan ridiculo y sin contenido, simplemente pa trata di gana interes di nos pueblo votado.
Na momento cu tuma nota di expresion di e miembro di fraccion di MEP riba e asunto di cuponan di MAVO y ta argumenta cu si tabatin placa pa tramnan core den centro di Oranjestad, ta confirma cu sano huicio politico cerca contrincantenan di Gobierno no ta existi.
Reconstruccion di centro di ciudad
E proyecto di desaroya y reconstrui centro di Oranjestad pa esaki mantene su balor turistico, ta algo cu riba su mes a cambia cara di nos pais. Un proyecto cu tabata necesario despues cu gobierno di MEP den ocho aña di gobernacion, solamente tabatin e vision di converti centro di Oranjestad den un centro di weganan di placa, a permiti Caya Betico Croes sigui decai di tal grado, cu e situacion tabata sumamente serio.
Na momento cu Gobierno di AVP a asumi responsabilidad na 2009, reconstruccion di centro di Oranjestad tabata un punto di vital importancia pa duna turismo di nos pais, un empuhe necesario den e direccion corecto loke a bira e caso tambe.
Pues no por tin duda cu tur aspecto di e proyecto pa reconstrui centro di Oranjestad, tabata un necesidad pa sigur turistanan crucero cu ta bishita nos isla pero tambe pa nos propio hendenan cu awor tin un centro sumamente bunita pa bishita.
Echonan cu ta splica mentalidad di MEP
Con MEP por cuestiona e cosnan aki, cu argumentonan asina fofo y casi infantil, nos no por compronde sigur ora cu MEP tin un lider, kende su famia a bay cu mas cu 28 miyon di pueblo sin cu pueblo a mira algo di e placa aki bek.
Integrantenan di MEP simplemente no por kere cu pueblo ta bay lubida cu entre otro Gobierno di MEP den pasado a yega di forma contract di huur di un edificio cu ainda tabata wordo construi y no tabata cla.
Ta mesun cos ora cu den propio conseho di Minister di Gobierno di MEP, a bay over na saca un clausula di e contract di huur di e hotel den centro di Oranjestad, cu a pone cu Gobierno di AVP mester a sigui paga huur pa e edificio aki, cu simplemente no tabata den condicion pa wordo uza.
Costo halto pa representacion legal di gobierno di MEP cu entre otro oficina di abogado cu lider di MEP tabata liga na dje, cu ta otro placa cu pueblo no a saca beneficio di dje.
Aki nos ta papia di mas cu 28 miyon di florin cu lider di MEP y su famia y amigonan a haya for di caha di Gobierno, aproba pa gobierno di MEP y cual placa nunca a bin bek pa pueblo den ningun tipo di forma.
Si kier compara vision anto mester sinceridad tambe di parti di politiconan di MEP, ya cu no por compara un proyecto manera embeyecemento di centro di Oranjestad, cu construccion di un scol MAVO-HAVO cu ta den plan di wordo ehecuta dor di Gobierno di AVP, c’un situacion di cupo cu a presenta awor pa inicio di e aña escolar nobo,” Parlamentario Jeffrey Kelly ta mustra.