Na October venidero lo cuminsa cu e di tres aña di e proyecto LeerWerk Traject (LWT) di Reclassering. E proyecto ta wordo realisa en cooperacion cu Openbare Avondleergangen Aruba, Directie Onderwijs, Dienst Publieke Scholen, Ministerio di Enseñansa y Maneho di Famia y Ministerio Asunto Social, Hubentud y Labor. E proyecto aki ta wordo co-financia door di Samenwerkende Fondsen Caribisch deel van het Koninkrijk y Gobierno di Aruba.
E proyecto Leer Werk Traject a crece y awo a haya un luga den e sistema educacional na Aruba. Cual ta haci cu esaki ta e ultimo aña cu Reclassering ta carga e proyecto y despues di e aña e lo bira parti di enseñansa fiho na Openbare Avondleergangen Aruba. Esaki ta pa Stichting Reclassering un logro hopi grandi. Nos kier a gradici inmensamente tur persona, compania, organisacionan entre otro Kansen voor Jongeren, CEDE Aruba y Gobierno pa kere den e proyecto Leer Werk Traject cual a haci e logro aki posibel.
E Leer Werk Traject ta pa hobenan entre edad di 16-25 aña cu no a caba scol secundario. E meta principal di e Leer Werk Traject ta pa yuda hobennan aki haya un papel den man y consecuentemente por drenta den e mercado laboral.
E proyecto a wordo modifica y lo consisti di diferente faceta (modules). Na final di cada face (module) e hoben lo ricibi un asina yama ‘deelcertificado’ unda ta duna e hoben acceso pa drenta den e mercado laboral di biaha of e por sigui bay scol y a base di acumulacion di deelcertificado lo duna e hoben e oportunidad di yega na su diploma riba nivel 1. Cual ta wordo reconoci na Aruba y na Hulanda.
E Leer Werk Traject ta consisti di tres diferente aspecto: Educativo, Laboral y Social.
1. Aspecto Educativo
Openbare Avondleergangen Aruba lo brinda e hobenan un biaha mas cuater diferente estudionan den forma di faceta (modules): ‘Assistent Automonteur’, ‘Assistent Onderhoudsmonteur’, ‘Assistent Commercieel Medewerker’ y ‘Assistent Uiterlijke Verzorging’. E Leer Werk Traject ta encera dos dia di teoria den cual e hobennan lo haya preparacion intenso den e sector di nan escogencia y alabes lo haya cursonan di Ingles, Hulandes, formacion personal, aritmetica (rekenen) y orientacion pa trabou. Durante e proyecto e hobennan ta bay scol 2 dia den siman.
2. Aspecto Laboral
Participando na e Leer Werk Traject e hobenan ta haya oportunidad di traha den forma di stage 3 dia den siman na un compania apunta. Durante stage e hobennan ta haya perspectiva y experiencia den area di e trabao. Esaki ta engrandece su oportunidad pa haya trabao den futuro. Mester remarca cu den pasado tabata tin diferente hoben cu a haya e oportunidad pa keda traha na e compania unda nan a stage. Un apelacion ta bay na companianan pa sostene nos y tuma un hoben pa stage den nan compania.
3. Aspecto Social
Ta sumamente importante pa remarca cu durante oranan di scol e hobennan tambe ta haya les pa nan desaroyo personal unda ta enfoca riba areanan social, emocional, moral y mental. Den e Leer Werk Traject e hobenan tambe ta ricibi guia individual pa asina den un of otro forma trece cambio positivo den nan circumstancianan personal.
Pa participa na e proyecto e hoben mester ta dedica y motiva pa traha riba tur tres aspecto. Participando na e Leer Werk Traject e hobennan ta haya un rutina diario den cual nan ta productivo y ta crea perspectiva pa futuro. Nan ta desaroya habilidadnan social y ta wordo stimula pa bira independiente.
Tur hoben cu ta interesa den e proyecto por tuma contacto cu Sra. Albertus na 582-1496 / 582-2491 of pa mas informacion y inscripcion por pasa libremente na oficina di Reclassering situa na Cay Ernesto Petronia 21-C.