Nuevo Mundo Foundation (NMF), hunto cu Scol di Musica “Rufo Wever” (SdM) y Gobierno di Aruba (GOB) a firma un “Letter of Intent” na 2017 pa crea un orkesta sinfonico hubenil.
Entre e firmantenan tin un entendimento cu NMF, cu participacion di SdM, lo haci e tramitenan pa ehecuta e “Intent” y cu GOB lo yuda segun mester, te asina cu e por. E entendimento tambe ta encera cu NMF lo sigui e filosofia y tacticanan di “El Sistema” di Venezuela cu a wordo introduci na varios otro pais cu hopi exito. Por ehempel, na Amsterdam tin nada menos cu 36 nucleo cu aya ta carga e nomber “Leerorkest”.
E filosofia di “El Sistema” ta originalmente di e Checoslovaco/Venezolano Emil Friedman:“Musica ta habri un caminda special y rapido pa muchanan desaroya nan sensibilidad y motivacion pa otro manifestacionnan artistico”.
NMF ta convenci cu musica ta un parti di loke ta haci hende feliz y pasobra e ta asina esencial, no por ta cu un mucha no por siña musica pasobra su famia no por paga pa lesnan. “El Sistema” ta un programa social cu gobierno di Venezuela ta financia pa tur mucha cu kier toca un instrumento musical por bin tuma les. Ningun mucha lo tin cu paga pa nan participa. NMF ta sigui e mes politica aki na Aruba. Pa NMF no ta necesario pa e mucha tin talento of e mucha a cuminsa tuma les caba y elr mucha a yega cierto nivel como tocado. Pa NMF, e condicion primordial ta cu abo ta interesa, e kier participa.
NMF tin un plan pa un Proyecto Piloto di un aña cuminsando januari 2019 cu ta bay tuma 100 mucha, muhe y homber, entre 8 y 17 aña. E plan ta encera dunamento di les di instrumentonan di cuerda: fio, viola, cello y contrabaho. Pa haya contacto cu e muchanan cu lo ta interesa pa participa den e proyecto, NMF ta invita tur mucha pa asisti na un ensayo general di e Aruba Symphony Orchestra di dia 27 of 29 di juli na Cas di Cultura. Esun di dia 27 ta cu e hoben (16 aña) pianista Claudia Roa di Chile cu a gana e competencia di studiantenan aña pasa. Musica lo ta di Mozart. E ensayo di dia 29 ta cu e famoso violinista Hapones Kazuhiro Takagi y musica lo ta di Mendelssohn.
Na hopi luga, e orkestanan ta cobra pa hende por presencia e ensayo general. Aki e muchanan ta haya entrada completamente gratis. Pa abo haya bo entrada y gosa di e privilegio aki, abo mester haci lo siguiente: Prome cu dia 30 di juni, bo mester busca un formulario na oficina di Cas di Cultura (for di 9’or di mainta te cu 5’or di atardi) of na Scol di Musica “Rufo Wever” (den e mes edificio piso ariba for di 1’or y mei te cu 6’or di atardi) cu bo mester yena cu algun dato personal manera nomber, adres, aña di nacemento, number di telefon, email, etc. y mester indica cu un “checkmark” (✔)ta cua di e dos ensayonan bo kier asisti. Bo mester entrega e formulario yena na e mes luga no mas tarda dia 5 di juli y lo bo haya un carchi di entrada pa e ensayo cu abo a scoge.
Solamente muchanan di 8 pa 17 aña lo tin e privilegio di asisti na e ensayonan. E cantidad di carchi di entrada ta limita. Busca un formulario no mas tarda dia 30 di juni y entreg’e mas lihe posibel, en todo caso, no mas tarda dia 5 di juli. Corda bon, “Wie het eerst komt die het eerst maalt”.
Pa mas informacion contacta Johnny Croes na +297 592 3762 of na [email protected] of contacta Clyde Harms na [email protected].