Cuerpo Policial Aruba ta inicia un opleiding pa Onder Inspecteur di polis. Un grupo grandi di mas cu 50 polis ta forma parti di e opleiding aki cu tin un duracion di mas o menos 1 aña y mey y cu lo wordo haci na Scol di Polis E.J. Watty Vos.
E grupo aki lo sigui desaroya, crece di rango, tambe haya mas responsabilidad. Pa altocomisario di polis drs. Ramon ARNHEM esaki nifica cu e meta principal ta pa inverti den hende, inverti den nos polisnan pasobra “e hende ta central”.
Mi ta hopi contento pasobra e tin di haber cu boso, boso futuro, boso carera policial. Cu boso dedicacion, determinacion y esfuerso boso por eleva e calidad pa futuro di Cuerpo Policial Aruba. Tabata palabra di altocomisario di Polis drs. Ramon ARNHEM.
Hopi Polis lo baha cu pensioen y cu e generacion nobo aki lo yena e stoel bashi cu lo wordo laga atras. E opleiding aki ta di suma importancia pa asina cada colega por sigui desaroya nan mes y amplia nan conocimento.
Como mando policial lo sigui inverti den cada agente pa nan por sigui desaroya y hisa e calidad. Cuerpo Policial Aruba ta den re-organisacion, desaroyo nobo y strategia nobo pero mas cu tur pa e salud y bienestar di cada polis.
Nos ta spera cu nos por crea lidernan nobo pa por carga nos organisacion pero tambe por guia y stimula e polisnan hoben. E trabou tin su riesgo y cada polis ta pone nan bida na peliger. Pero na momento cu bolbe bek warda e ambiente por ta trankil y sano pa por sigui brinda e servicio. Mando policial ta conta riba cada un polis y ta desea nan hopi suerte y exito pa cu e opleiding!
