Hopi ta e companianan cu ta tuma personanan ilegal den servicio. E companianan aki ta priminti di pidi permiso pa nan. Algun ta bay asina leu di gaña e stranheronan di cu nan permiso ta den proceso, mientras cu hopi biaha esaki no ta e caso.
Esaki tabata e caso di un dama cu a wordo tuma den servicio di un compania local di watersport. Nan a priminti e dama aki di introduci su papelnan na DIMAS, pa asina e bin na remarca pa un permiso pa trabao. Pero ora cu e dama en cuestion a cuminsa averigua pa cu su permiso, a bin resulta cu su permiso a wordo nenga.
Tur esten cu e dama tabata en espera di su permiso, a bin resulta cu nan tabata kita loonbelasting, aov/aww y te hasta AZV pa e dama aki. Siendo cu e persona aki como ilegal, no mester paga nada, ya cu e no tin derecho di nada. Pregunta ta e ora: kico a wordo haci cu e placa cu e compania aki, Coco Loco a kita for di e persona aki a bay? Obviamente, e no a wordo afgedragen na Departamento di Impuesto. Y e persona aki, como ilegal, no tin derecho ariba AZV.
E dama aki a wordo retira un dia cu el a cambia su dia liber cu’n otro colega di dje. A resulta cu e mesun dia aki, Guarda Nos Costa a bin tira un control den e compania aki. Aki ta caminda cu e dama a haya miedo, y e no kier a bay traha asina ey. E tabata tin miedo cu e wordo gara mirando cu su permiso a wordo nenga. Door di esaki doñonan a retira e dama for di trabao.
El a wordo conseha pa bay Labor, cual el a haci tambe. Aki nan a splik’e cu e mester wordo paga 3 mil florin, segun calculonan haci na Departamento di Labor. Pero e hefe, Irma, a nenga di dun’e su pago. A kita 300 florin for di dje, pa 2 flanel NIKE cu supuestamente a costa 150 florin cada uno, siendo cu a paga 30 dollar pa cada uno. Tambe nan a kita placa for di dje pa a saca su passpoort, cu ta su mes mester a manda saca via su famianan aya na Venezuela. A kita 500 dollar tambe for di dje, pa un otro pago cu mester a wordo haci na un tercera persona pa cu su permiso. En total nan no a pag’e ni e mita di loke e tabata tin derecho ariba dje. A pag’e no mas 1200 florin, trahando di mainta te cu anochi. Nan tabata pone e dama traha oranan extra sin cu nan tabata wordo paga pe.
En total nan tabata tin 3 ilegal den servicio, di cual un di nan ainda ta na hospital despues cu el a haya accidente. Tambe tabata tin un otro dama cu a wordo priminti di saca su permiso pe, cu a wordo retira inhustamente, sin cu el a haya su pago correspondiente.
Unico cu e dama ta pidi ta HUSTICIA. Aworaki nan no kier para responsabel tampoco pa e empleado di nan, cu tambe a wordo priminti di saca su permiso, y cu tambe tabata kita loonbelasting, aov/aww, AZV for di dje.
Varios ta e personanan cu bin dilanti pa denuncia e abusonan laboral aki di parti di nos hendenan local na personanan ilegal. Ta kita e gastonan social for di nan, sin cu esaki ta wordo afgedragen na Departamento di Impuesto.
Loke mester corda ta, cu no ta paso cu e persona ta ilegal, mester haci abuso di nan. No pone un persona traha oranan largo pa despues keda sin pag’e loke el a traha pe. No priminti un trahado ilegal di saca su permiso pe, y keda gaña e trahado cu e permiso ta den proceso, siendo cu of e permiso a wordo nenga of mas pio ainda, nunca a haci e peticion na DIMAS.
No gaña e personanan aki cu door cu bo tin contacto, cu bo tin placa pa paga, cual ta un acto castigabel, di extorsion of soborno. Ta masha poco ta e casonan asina cu ta bin dilanti, pero hopi ta bay di akinan sin cu nunca a ricibi nan placa cu nan a traha pe.
Pa loke ta e caso di e dama aki en cuestion, e doñonan di Coco Loco Bar tabata kier pa e dama aki a wordo deporta, pero mirando cu su permiso a wordo nenga, el a dicidi di bandona Aruba di su mes.