Mario Arends Cruise Manager na Aruba Tourism Authority (ATA) a duna un presentacion recientemente na Museo Industrial unda a intercambia idea cu operadornan di tour bus y taxi, tocante kico tur por haci cu turistanan na San Nicolas.
Sr. Arends a elabora riba tur e rekisitonan y locual cu e turistanan ta buscando y pues a duna e operadornan di tour inspiracion riba e topico. A trata diferente opcion di pakete cu por traha di tour pa San Nicolas di diferente duracion entre otro cu . “ATA, Departamento di cultura y Ministerio encarga cu Turismo ta dunando hopi apoyo na loke ta e contenido di tur e atraccionnan cu por wordo haci na San Nicolas. E idea ta pa crea un variedad di paketenan cu ta brinda e plataforma pa yuda pusha e parti di San Nicolas, esaki e operadornan a bay di acuerdo cu ne pa sosode. “Mester corda cu e turista di cruscro ta uno cu ta ripiti hopi, pues ta importante pa por percura cu e producto ta constantemente diferente pa hende cu ta bin tur aña tin cos diferente di haci. P’esey esaki ta un oportunidad hopi bon”.
Operador taxi San Nicolas
Henry Dubero ta taxista y ta representa gruponan di taxista “Blue Diamond” ta splica cu el a atende e reunion bou invitacion di Ministerio cual e ta orguyoso di por a asisti. ‘Mi ta di opinion cu locual cu gobierno ta haciendo pa atrae turista/bishitante na San Nicolas ta hopi bon, pasobra no ta pabou so mester enfoca riba turismo. Mester cubri full Aruba cu turista pa asina nan por conoce henter Aruba, cual aworaki no ta e caso’. El a enfatisa cu mayoria biaha e turistanan ta conoce e parti pabou so di Aruba, pues e iniciativa ta hopi bon.
‘Aworaki ta turno di San Nicolas, te cu e momentonan aki si turista bin San Nicolas nan ta conoce Baby Beach so, pero teniendo na cuenta tur cos cu a wordo drecha den caya, mi ta kere mas y mas turistanan lo bishita e cayanan/otro areanan. Si tene cuenta Carubbian por ehempel tambe ta hopi exitoso esey ta mi opinion. Mi ta spera cu tur otro operador di taxi por contribui cu e desaroyo aki y trece turistanan pa conoce San Nicolas’, el a termina bisando.