E “Orde van Vrijmetselaren in Nederland” of Ordo di Masonnan Hulandes a declara diasabra 10 di September 2016 como e “Dia Nacional di Masoneria”.
Na Aruba e aña aki e logianan di Aruba ta pone e opendag dia 17 di September 2016. Logia King Solomon ta habri su portanan pa publico.
Masonnan, ta kico eseynan ta? Kico bo ta ripara di nan, den e bida diario? E miembronan ta uza Masoneria pafor di logia? Tin hopi storia tocante di Masoneria pero pa hopi hende toch e ta keda un gran secreto. Ya desde un cantidad di aña e Masonnan Hulandes a desea di trece mas claridad riba nan actividadnan. P’esey cu riba diasabra 17 di September 2016 en conexion cu ‘Dia di Masoneria’, tur Logia Hulandes ta habri nan portanan pa publico en general. Na Aruba tin tres Logia Hulandes: “El Sol Naciente”- “King Solomon”- “ The Middle Chamber” y tambe un Logia Venezolano – “Hiram”. Pa esnan interesa e ta un oportunidad unico pa sera conoci cu Masoneria, e biaha aki tur e logianan di Aruba lo ta representa na e edificio di Logia “King Solomon” cu ta situa na Dadelstraat # 27 na Dakota di 10:00 di mainta pa 2:00 di merdia.
Masoneria conoce hopi tradicion, pero tambe ta algo actual. Loke cu esnan cu no ta miembro sa di e hermandad, ta mayoria parti di e tradicion, e ritual y e simbolonan, manera e “paser” y “square”. Pero hopi biaha e Masonnan no ta bin hunto pa un ritual, pero pa un anochi di instruccion caminda un charla ta wordo teni y un intercambio di idea ta sigui. Discusion riba politica y religion ta wordo evita, pero esaki no ta nifica cu e topiconan aki di nos sociedad ta taboe. Purba gana un otro pa bo punto di bista no ta e meta. Masonnan ta pone nan opinion banda di otro y no contra di otro.
Masoneria ta pa profundisa den spiritualidad. Asina un hende ta siña conoce su mes mas miho, p’asina e persona por aporta den construccion di un miho comunidad. “Mehora mundo pero cuminsa cu bo mes”, por ta e slogan tambe. Masoneria ta reconoce e balor inmenso di e personalidad humano, e igualdad di tur ser humano, e derecho di cada ser pa independientemente busca e berdad y cada hende su responsabilidad pa su mesun actuacion pa haci of no.
Transicion – desaroyo – ta esencial den Masoneria. E caminda pa mehora bo mes, pa e Mason ta e caminda of e biahe simbolico pa e Luz. Masoneria ta kere cu cada ken na su manera sa cu tin mas cos entre Tera y Shelo cu ta move humanidad, un asina yama principio superior. Cada Mason ta liber pa segun su mesun bista pa completa esaki y pon’e manera cu e ta desea. Esun cu ta kere den un Dios, e otro den e combinacion di forsa di naturalesa y e otro den e ser supremo den su mes of den su consenshi.
Masoneria pues no ta un religion, pero e hermandad si ta spiritual.
Bo ta interesa den Masoneria? E portanan di Logia “King Solomon” ta hancho habri riba diasabra 17 di September 2016 en conexion cu e “Dia di Masoneria” di 10:00 am pa 02:00 pm. Pa mas informacion wak e website www.dagvandevrijmetselarij.nl y http://www.vrijmetselarij.nl