Den e fin di siman tras di lomba, Aruba Karate Bond a organisa e “Open Aruba Karate Championship 2018”, esaki den e en conexion cu ASU Olimpiada. Dilanti un publico aceptabel den Centro Deportivo Betico Croes alrededor di 60 karateka den tur categoria a asisti na e campeonato aki cu un bes mas a conta cu un participacion internacional cu atletanan for di Boneiro, Corsou y Venezuela sin lubida nos propio atletanan di Aruba.
Na banda di e competencia e federacion di Karate a organisa un seminario cu e topiconan ‘reglamento 2018 WKF’ y tecnica di ‘kumite’ duna pa e expert internacional di Venezuela, ‘sensei’ Edgar Albakian kende ta 6 Dan Karate Do Genbukai, miembro di e federacion Venezolano di karate (FVKD) y arbitro ‘A’ di World Karate Federation (WKF). Tambe presente nos por a mira ‘sensei’ William Millerson, vice-presidente di World Karate Federation. Presidente di Aruba Karate Bond -‘sensei’ Felix Tromp a habri e mainta aki unda e la desea tur participante hopi exito y alabes gradici tur esnan cu a contribui cu e dia di torneo cu sigur tabata uno exitoso.
Un pabien ta na tur e scolnan cu a participa pa haci e dia aki uno inolvidabel pa nos atletanan, specialmente esnan cu a caba di cuminsa practica e deporte di combate.
Lotto, e loteria di Aruba pa medio di Stichting Sportsubsidie Aruba a yuda subsidia e torneo internacional di karate, “Open Aruba Karate Championship 2018” organisa pa Aruba Karate Bond.
Lotto, e loteria di Aruba tin diferente wega; Catochi, Big 4, 1-OFF, Zodiac, Wega di Number Korsou di Lotto, Lotto di Dia, Lotto 5, Mini Mega cu su Mega Plus y e weganan di Raspa y Gana. Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.